A fotoperiodista de La Voz Mónica Irago recibiu unha das mencións especiais
02 mares 2024 . Actualizado ás 05:00 h.Parece que foi onte cando arrincou a idea, pero a Festa do Deporte de Vilagarcía acadou xa o seu 31.ª edición. Fíxoo cunha gala que encheu o Salón García e que proclamou a Jessica Bouzas como a mellor deportista do ano 2023 en Vilagarcía. A tenista superou nas preferencias do xurado a Pedro Torrado (piragüismo), Pedro Muñoz (kenpo), Martín Rey (ciclismo) e Anxo Martínez (remo). Como dixeron algúns delas nas súas intervencións, unha pléyade de deportistas do máis alto nivel, que demostra a boa saúde que ten a actividade deportiva en Vilagarcía.
Bouzas aparecía como a principal favorita ao galardón, que é a primeira vez que consegue pero que tendo en conta da proxección que está a manter probablemente non será a última, debido aos logros que conseguiu o ano pasado. Venceu no ITF W60 de Roma, no quinto Master Mapfre Valladolid , e no Campionato de España por equipos. Formou parte da selección española na United Cup en Australia e converteuse na primeira tenista arousá da historia en participar no cadro final dun Grand Slam, en Wimbledon . Este ano tampouco comezou nada mal para a vilagarciá, que xa suma dous títulos. O máis recente, en México . Resultados que a levaron a escalar ao posto 124 da clasificación mundial, onde é a sexta mellor española no ránking.
Jessica Bouzas non puido acudir á gala porque está aínda no continente americano. Tras participar nun par de torneos en México está á espera de coñecer se consegue un oco na previa doutro dos torneos que integran o Grand Slam, o que se disputará dentro unhas semanas en Indian Wells.
Coa tenista arousá a miles de quilómetros de Vilagarcía foi quen exerceu como o seu primeiro adestrador no Club de Tenis O Rial, Dani Otero, o encargado de recoller o seu galardón. Os seus galardóns, en realidade. Un, o que a acreditaba como un dos cinco finalistas; o outro, o que levou como mellor deportista do ano 2023 en Vilagarcía. Tras a proclamación de Bouzas, todos os premiados, ademais de quen foron galardoados coas mencións especiais e os familiares de quen foron homenaxeados a título póstumo, posaron xuntos sobre o escenario para a tradicoial foto de familia.
A fotoperiodista de La Voz Mónica Irago recibiu unha das mencións especiais
Durante a gala entregáronse tres emotivas mencións especiais a título póstumo. Foron as que homenaxearon a Martín Cardalda, Tinín, pola súa traxectoria como adestrador e directivo do San Martín, a Luis García Loureiro Luisiño, en recoñecemento ao seu labor como directivo do Club Deportivo Bamio, e a Chuco Pérez Lafuente, pola súa traxectoria nos deportes da vela e o baloncesto. Foi un dos momentos máis emotivos da noite. Javier, o fillo de Chucho, Juan Daniel e Antía, fillo e neta de Luisiño respectivamente, e David, fillo de Tinín, foron quen subiron ao escenario para recoller o galardón destinado aos seus respectivos pais e o cariño do público.
Doutra banda, entregáronse ademais varias mencións especiais tal e como sucedeu durante todas as edicións da gala. Os galardoados foron o adestrador Luis Treviño polo seu labor á fronte do conxunto feminino do Viaxes InterRías tamén polo labor que desempeña como técnico de base na ED Arousa. No capítulo de patrocinadores foi a empresa Sigaltec a recoñecida e recolleu o galardón César Mera. A fotoperiodista de La Voz de Galicia Mónica Irago foi a galardoada no apartado dos medios de comunicación. Pablo Murás Abad, que practica o kenpo adaptado, foi o premiado no apartado de deporte para todos. Sen saír do Kenpo, o club vilagarcián foi o recoñecido na organización de eventos polo Campionato de España, que se celebrou en Fexdega . O Pérez Sub foi quen mereceu o recoñecemento este ano no apartado de mellores clubs E, para rematar, Sara Gómez foi recoñecida na Gala do Deporte pola súa traxectoria deportiva tras vinte anos no baloncesto feminino profesional, a inmensa maioría delas na Agrupación Deportiva Cortegada, cun vídeo no que falaron moitos dos que foron os seus adestradores.