Sogama porá a funcionar en probas a súa planta de biorresiduos de Baión o 2 de novembro
AROUSA
A instalación acumulará así polo menos un mes de atraso respecto á previsión ofrecida en agosto polo presidente da sociedade pública
27 oct 2023 . Actualizado á 14:22 h.O presidente de Sogama confirmaba o 8 de agosto sobre o terreo que a planta de biorresiduos do polígono de Baión poríase en marcha en outubro. O dardo anunciador de Javier Domínguez desviouse lixeiramente da súa diana. Desde Sogama informouse esta semana que será o vindeiro xoves, 2 de novembro, cando entre en funcionamento a instalación. Farao, en todo caso, en período de proba, que se prolongará o tempo necesario en función de se se descobre a necesidade dalgún tipo de axuste para a súa correcta operativa.
Completado dito período, só quedará comezar a recibir os residuos daqueles dos 26 concellos das comarcas do Salnés, Caldas e Pontevedra para os que se deseñou o complexo interesados no seu servizo. A planta dispón de capacidade para tratar 15.000 toneladas de materia orgánica e 7.000 de material estructurante ao ano, coas que xerar 6.000 toneladas de compost para agricultura e xardinería.