Cambados contará co Posto de Mando Avanzado, a «caravana morada» e faranse controis de alcoholemia e drogas
21 jul 2023 . Actualizado ás 20:55 h.Os movementos dos cambadeses durante o Albariño serán gravados por cámaras de videovigilancia. Colocaranse media ducia en lugares estratéxicos do pobo, como a praza de Fefiñáns e a praza do Concello, dentro do dispositivo de seguridade organizado para a festa. Os sistemas de gravación contan xa coa oportuna autorización da Subdelegación do Goberno de Pontevedra e estarán conectados ao Posto de Mando Avanzado da Axencia Galega de Emerxencias, que se instalará na avenida de Vilariño.
Esta é unha das cuestións que se abordou este venres na Xunta Local de Seguridade celebrada en Cambados como cada ano por estas datas para aprobar o plan de seguridade da festa. Neses días despregaranse operativos especiais con medios terrestres e aéreos e realizaranse controis de alcoholemia e drogas nas estradas de acceso ao centro urbano.
O operativo de seguridade atende, tamén, á regulación do tráfico —a circulación estará cortada na contorna da praza do Concello— e inclúe plans de evacuación para aqueles puntos onde se prevé unha gran concentración de xente, caso da praza de Fefiñáns ou o paseo da Calzada. A capacidade da praza, onde se van celebrar os concertos queda fixado en 4.950 persoas e, neste ocasión, non se valarán as entradas a pesar de que dúas dos concertos son de pagamento.
Co fin de favorecer o aparcadoiro e evitar a saturación do tráfico no centro habilitaranse aparcadoiros disuasorios gratuítos nas avenidas de Vilagarcía, Vilariño e Castrelo.
Debido ao incremento de poboación que rexistra Cambados na primeira semana de agosto faise necesario reforzar o persoal da policía local con axentes doutros concellos e contratar seguridade privada. A Garda Civil sumarase ás tarefas de control cos efectivos que sexan precisos, segundo informou a subdelegada do Goberno en Pontevedra, Maica Larriba. Xunto a ela asistiron á reunión o alcalde, Samuel Lago, o xefe provincial da Garda Civil, Simón Venzal, e responsables da Policía Local e Garda Civil de Cambados.
Respecto da cobertura sanitaria, Samuel Lago confirmou que o Sergas reforzará o persoal do PAC e o Concello contratará ambulancias e un servizo de hospital de campaña. O Albariño tamén contará coa «caravana morada» para asesorar ante agresións e outras incidencias.
Preguntada respecto diso, Maica Larriba confirmou que as obras do novo cuartel empezarán a finais de agosto ou, como moi tarde, en setembro. «Máis pronto que tarde, o cuartel vai ser unha gran realidade».