Unha manifestación pola sanidade pública percorrerá Vilagarcía o 14 de outubro
AROUSA
A plataforma traballará para mobilizar á cidadanía do conxunto do Salnés
07 sep 2022 . Actualizado á 22:36 h.«A situación da atención primaria nas localidades de Arousa e do Salnés é absolutamente inaceptable: centros de saúde e puntos de atención continuada pechados, consultas pechadas, grandes dificultades para contactar cos centros de saúde, prioridade para as consultas telefónicas, listas de espera desproporcionadas e equipos de persoal reducidos a menos da metade». Este é o argumentario que a plataforma SOS Sanidade Pública O Salnés puxo onte sobre a mesa para convocar unha manifestación que se desenvolverá en Vilagarcía o 14 de outubro, un venres, ás oito da tarde. «Fronte a esta situación —resolveu o portavoz do colectivo, José Manuel Ribadomar— só cabe unha gran mobilización social».
SOS Sanidade Pública proponse traballar no mes que queda por diante para conseguir que «a veciñanza dea unha resposta contundente» ás dificultades que arrastra a atención primaria. Tendo en conta que a convocatoria é de ámbito comarcal, os seus membros estarán presentes en todo O Salnés. «Durante o verán —engade Ribadomar— a situación agravouse de maneira desproporcionada pese ao incremento de poboación pola tempada turística». Algo que, en opinión da plataforma, evidencia que «os responsables da Consellería de Sanidade e do Sergas non son capaces de planificar os recursos da atención primaria ou simplemente non lles importa».
Ademais de buscar o apoio dos nove municipios que conforman O Salnés, a través da presentación de mocións nos seus plenos, o colectivo quixo valorar positivamente a campaña de recollida de firmas en apoio dunha iniciativa lexislativa popular en materia sanitaria. Nos seus tres primeiras saídas, esta acción conseguiu reunir catro mil rúbricas, que animan a SOS Sanidade Pública a intensificar a súa actividade na comarca.
Entre as principais reivindicacións da iniciativa lexislativa popular atópanse a apertura dos centros, PAC e consultas que permanecen pechados, a priorización das consultas presenciais, a incorporación de novos profesionais e persoal administrativo nos centros de saúde, un proceso de negociación e un presuposto que permita executar estas medidas.