A actividade organizouse, como todos os anos, coincidindo co Día do Libro
24 abr 2022 . Actualizado ás 05:00 h.Desde hai anos, Vilagarcía fai coincidir o Día do Libro coa entrega de premios aos mellores lectores e usuarios do servizo de préstamo da sección infantil e xuvenil da biblioteca Rosalía de Castro. E así foi onte tamén. Os premiados recibiron un lote de litros e un diploma conmemorativo.
Foron os concelleiros de Cultura, Sonia Outón, e de Educación, Miro Serén, os encargados de entregar os galardóns aos nenos que destacaron no último ano por ter utilizado o maior número de veces o servizo do centro nun acto que tivo lugar no edificio de Rey Daviña. Os galardoados nesta ocasión foron Andrés Entenza, Martín Santos, Brais Vermellas, Jesús Gil, Lucía Mariño, José Manuel Gil, Daniela Docampo, Aldara Martínez, Ariadna Martínez e MurielNovell .
Hai xa 22 anos que a biblioteca municipal concede estes galardóns aos mellores lectores, unha iniciativa que quere premiar a constancia e a fidelidade dos máis pequenos no uso do servizo de préstamo, ademais de fomentar o uso a biblioteca e os hábitos de lectura desde a infancia. Para poder optar a estes premios, os usuarios deben ter entre 6 e 12 anos de idade e posuír o cartón de préstamo cunha antigüidade igual ou superior a seis meses. Outro requisito que teñen que cumprir é que teñan retirado libros en préstamo polo menos en catro meses distintos. Ningún usuario poderá recibir o premio durante máis de dous anos consecutivos.