Gustavo César Veloso perde case dez minutos tras outra mostra de sacrificio

La Voz VILAGARCÍA / LA VOZ

AROUSA

Clube de Ciclismo de Tavira e Atum Xeneral / Tavira / Maria Nova Hotel.

Renqueante pola súa caída do domingo, descolgouse nos últimos catro quilómetros da quinta etapa da Volta a Portugal tras volver traballar para Marque e xa está a 17.07 do novo líder

11 ago 2021 . Actualizado ás 05:00 h.

«O meu primeiro obxectivo vai ser tentar axudar todo o posible a Marque e chegar a Viseu -punto final da Volta a Portugal-». Esta era onte a declaración de intencións de Gustavo César Veloso na meta de Santo Tirso. A chegada da quinta etapa da rolda lusa, tras 171,3 quilómetros cos que se reiniciou a carreira logo da xornada de descanso. Un suplicio maior inda para o arousán ca etapa do domingo, na que unha caída na saída neutralizada o deixou maltreito e acabou sepultando as opcións de pechar a súa carreira gañando a súa terceira Grandíssima.

Como o domingo, Gustavo baleirouse para tentar axudar o seu amigo Álex Marque a protexer o xersei de líder. Como o domingo, terminou pagando o desgaste do seu corpo ferido no treito final. Cedendo outros case dez minutos na xeral, descolgado a uns 4 quilómetros de meta do grupo dos favoritos -por diante triunfou o británico do Israel C. Mason Hollyman-. O de Bamio, que confesou que non daba feito forza coa súa perna esquerda, mancada na caída do domingo, é agora 31º. a 17.07 do novo líder, Daniel Freitas (RP), que avantaxa en 42 segundos a Marque, segundo.