Foi a súa primeira carreira UCI ProTour en sete anos
23 abr 2019 . Actualizado ás 12:49 h.Nonaxésimo terceiro, a 24 minutos e 19 segundos do vencedor, o austriaco Felix Grossschartner (Bora-Hansgrohe). Gustavo César Veloso completaba o domingo a Volta a Turquía, a súa primeira carreira UCI ProTour en sete anos, moi lonxe da cabeceira da xeral, pero con excelentes sensacións de cara ao resto dunha tempada na que o vilagarcián quere espremer ao máximo o mundo de oportunidades que se lle abriron co salto do W52-F.C. Porto a continental-profesional, a segunda categoría do pelotón ciclista profesional.
«Veño contento da miña Volta a Turquía», declaraba onte o arousán practicamente recentemente chegado de volta a terras galegas. «Sabía que non chegaba para poder disputar a xeral» pero comprobou que, sobre a base de todos os condicionantes que o acompañaban nesta ocasión, «as cousas van ben para chegar ben aos principais obxectivos da tempada. O traballo que fixen en altura está aí, e antes ou despois vai saír».
O primeiro condicionante é o feito de ter chegado a Turquía, unha rolda de seis etapas, cun único día de competición nas pernas, coa súa entrada en carreira atrasada por un accidente doméstico con afectación a unha costela. O segundo, correr unha volta na que o exceso de pole minguou a un alérxico como Veloso nos seus catro primeiras etapas, nas que «o motor non me ía», lembra, indo de menos a máis.
Así as cousas, o bicampión da Volta a Portugal, vencedor dunha Volta a Catalunya e unha etapa da Volta a España di ter cumprido o seu rol en Turquía, que non era outro que o de axudar a Edgar Pinto e Raúl Alarcón a pelexar polo Top 10. O primeiro finalizou quinto na xeral, un resultado «importante para o equipo na súa primeira carreira ProTour».
«Fixen o traballo que me tocaba, e sentín que volvía ao ciclismo onde estiven, e no que levaba anos sen estar; botaba un pouco de menos estar nunha carreira UCI ProTour», afirma Veloso.
Volta a Castela-León
Gustavo César entra, agora si, de cheo na tempada, disputando desde o xoves e ata o sábado a Volta a Castela-León, co cambadés Anxo Sánchez entre os seus compañeiros de fila.