O Obradoiro completou a primeira sesión do ano con todos os xogadores en Sar
24 ene 2021 . Actualizado ás 05:00 h.O 29 de decembro o Monbus Obradoiro parou as máquinas. Confirmado un positivo no cadro de persoal, os demais integrantes do primeiro equipo illáronse nos seus domicilios e as probas PCR seguiron revelando contagios. Da expedición que viaxara a Murcia a fin de semana anterior só se salvaron dous integrantes. O 23 de xaneiro foi o día de regreso e continuación en pleno a Sar. Xogadores, adestradores e fisioterapeutas volveron coincidir sobre o parqué.
Probablemente Moncho Fernández puidese facer súa a frase que pronunciou Frei Luis de León no seu retorno á cátedra, tras case cinco anos en prisión: «Como diciamos onte...». No caso do Obra, a paréntese, tamén obrigado, foi máis curto, de case un mes. E non é un o que regresou senón todo o grupo, para seguir de igual xeito que antes do parón.
Dese estraño salto temporal daba conta a mascota, que aínda lucía gorro de Papá Noel detrás do banco santiagués.
Non foi como o primeiro día de pretemporada porque algúns xa coincidiran en xornadas previas. Pero si estaban todos xuntos de novo por vez primeira.
Non había rastros de sobrepeso por ningún lado. Antes ao contrario, Birutis parece unha lámina e, desde a distancia, xogadores como Álvaro Muñoz e Jake Cohen tamén semellaban máis afiados. Recuperar o ton muscular é unha das tarefas máis urxentes.
Moncho Fernández atopouse con dezaseis xogadores ás súas ordes, os catorce do primeiro persoal e dous reforzos do equipo de EBA, Cubero e Guille. Rafa García, que aínda non pode facer exercicios con balón, só estivo na primeira parte e volveu á conclusión.
Distribuíunos en tres grupos que dedicaron boa parte da sesión a ensaiar xogadas de cinco contra cero, sen oposición nin contacto. Un dos quintetos estaba integrado por Pepe Pozas, Oliver, Álvaro Muñoz, Álex Suárez e Birutis; outro por Koniaris, Robertson, Guille, Enoch e Cohen; e o outro por Kartal Ozmizrak, Beliauskas, Czerapowicz, Daum e Cubero.
Moncho Fernández aproveitou algunha das pequenas pausas para a hidratación a fin de intercambiar impresións co último en chegar, Antonis Koniaris.
Cando a mañá se achegaba xa ao final, Enoch demostrou que mantén as forzas intactas despois da corentena. Ao executar un mate esnaquizou o cristal do taboleiro, aínda que non chegaron a caer os anacos sobre o parqué. Tan espontánea foi a cara do pivote tras a involuntaria desfeita como a reacción do grupo, que o arroupou cun simpático aplauso.