A noticia do falecemento de Kobe Bryant afogou a celebración no vestiario
27 ene 2020 . Actualizado ás 00:37 h.A vitoria máis traballada da tempada, nunha noite de gran baloncesto en Sar, viuse eclipsada pola conmoción da noticia do falecemento de Kobe Bryant. Os xogadores coñecérona nada máis entrar no vestiario e xa non houbo celebración, nin música nin algarabía, aínda que si satisfacción polo triunfo.
Álvaro Muñoz explicaba a secuencia: «Estabamos a pegar saltos, decatámonos e non se oía unha alma. É un ídolo de moitas xeracións. Crecín véndoo xogar a el e a Iverson, por iso empecei a xogar a baloncesto. É algo durísimo».
Moncho Fernández finalizou a súa comparecencia de prensa referíndose tamén á luctuosa noticia chegada desde Estados Unidos: «É unha desgraza moi grande para o mundo do basket e, sobre todo, para a súa familia»
No que se refire ao encontro, acabou moi satisfeito co desempeño dos seus discípulos: «Creo que realizamos un partido moi completo desde o punto de vista ofensivo. Soubemos explotar as nosas virtudes e os xogadores demostraron moito acerto, non só nas situacións próximas ao aro senón tamén no lanzamento de tres. Ao final foron fundamentais. Desde o punto de vista defensivo tivemos altibaixos con algún problema no rebote, que lles permitiu anotar en segundas opcións. Cando chegou o momento clave, no último cuarto, estivemos francamente ben nos dous aspectos. No defensivo, recuperando balóns que nos permitiron correr e recuperar a vantaxe que tiña o Valencia. E creo que nas últimas posesións o equipo estivo francamente ben. Ao final, estes partidos tan igualados defínense por detalles. A canastra de Chris e a de Mike Daum foron fundamentais».
Ao ser preguntado polo bo expediente de De Zeeuw, quixo pór o acento no grupo: «Estivemos brillantes nas actuacións individuais. De Zeeuw fixo un bo partido, el e outros compañeiros».
Mike Daum, que ante o Burgos xa xogou uns minutos no perímetro, demostrou que se está adaptando ben a este labor: «O que intentamos foi, ante os problemas destas semanas en formas de lesións, buscar solucións con xogadores interiores que poden axudarnos no exterior, como é o caso de Mike. E coa axuda dos do filial, nos adestramentos. Dos interiores, o que ten máis habilidades para xogar nesa posición é Mike. Está a darnos outra disposición táctica que non tiñamos».