Detectan en Xove e Muras a dous condutores circulando a 179 km/h en tramos limitados a 90 e a 80
VIVEIRO
Un turismo foi identificado no corredor Xove-Celeiro e o outro, na LU-540, entre o municipio viveirense e Cabreiros
01 jul 2025 . Actualizado á 11:40 h.Unha persoa está a ser investigada como suposta autora dun delito contra a seguridade viaria por circular a 179 km/h en sentido decrecente pola estrada CG-2.3, entre Xove e Celeiro, onde a velocidade máxima permitida é de 90 km/h, limitación xenérica no devandito tramo da vía. Os feitos rexistráronse no quilómetro 3,200 do corredor que une os concellos xovense e viveirense.
O grupo de investigación e análise de tráfico da Comandancia de Lugo iniciou unha investigación que permitiu conseguir probas obxectivas que posibilitaron a identificación do condutor no momento en que se detectou o exceso de velocidade. A persoa investigada e as dilixencias policiais foron postas ao dispor do Xulgado de Instrución de garda de Viveiro.
Así mesmo, a Garda Civil tamén identificou no termo municipal de Muras ao condutor dun turismo que circulaba en sentido crecente a 179 km/h á altura do quilómetro 31,500 da estrada LU-540, entre Viveiro e Cabreiros. No lugar no que foi identificado a velocidade máxima permitida está fixada en 80, segundo indicaron fontes oficiais.
Unha patrulla identificou o condutor e a unidade de investigación de seguridade viaria de Burela encargouse das dilixencias policiais. O condutor e único ocupante do vehículo foi imputado en calidade de investigado como suposto autor dun delito contra a seguridade viaria. As dilixencias foron remitidas ao Xulgado de Instrución de garda número 1 de Vilalba.
Desde a Garda Civil recomendan precaución e respecto ás limitacións de velocidade e lembran que o artigo 379 do Código penal establece que aquel que quen conduza un vehículo de motor ou un ciclomotor a unha velocidade superior a 60 km/h en vía urbana ou en 80 km/h en vía interurbana á permitida regulamentariamente será castigado coa pena de prisión de ata seis meses e, en calquera caso, coa privación do dereito para conducir vehículos de motor e ciclomotores por tempo superior a un e ata catro anos.