Unha manifestación desde Celeiro ao centro da localidade serviu para protestar contra o peche da fábrica
07 jul 2022 . Actualizado ás 21:37 h.Medio milleiro de persoas, segundo a CIG, participou este xoves nunha manifestación contra o peche da fábrica da conserveira Albo en Celeiro e pola continuidade dos empregos e a produción na planta. A comitiva de protesta partiu da factoría para avanzar pola Avenida de Ramón Canosa, o principal acceso a Viveiro , e acadar a Praza de Lugo para rematar nos Xardíns de Noriega Varela.
«Queremos conservar os empregos na Mariña». Así rezaba a pancarta que encabezaba a protesta, durante a que os manifestantes pronunciaron cánticos como «Menos contos chinos: nin traslados nin despidos»; «A Plisán que se vaia Yong Wang»; o «Queremos traballar e non emigrar» o «Sen Industria non hai futuro», consignas xa habituais nunha comarca, A Mariña, que nos últimos 20 anos perdeu centos de empregos industriais. De non reverterse o peche, desaparecerían outros 42 postos de traballo, a maioría ocupados por mulleres maiores de 50 anos e cunha difícil reinserción laboral.
As traballadoras reiteran o seu rexeitamento a un traslado a Salvaterra de Miño, onde a empresa quere centralizar a produción. Mudarse a 271 quilómetros «é unha indignidade despois do que levamos suado nesa factoría. Non imos aceptar que trunquen as nosas vidas», sinalan. Ademais, censuran que o holding chinés Xangai Keichuang, titular da marca, «ofrece unhas indemnizacións totalmente cativeiras».
O secretario xeral da CIG, Paulo Carril, defendeu desde Viveiro a viabilidade da fábrica mariñá, «con carga de traballo abondo para manter os actuais niveis de emprego, que resulta viable economicamente e dispón dunha situación privilexiada a carón de dous portos pesqueiros como Celeiro e Burela». Tras comunicar a Xunta que hai dúas empresas interesadas en continuar a actividade, o sindicato reclama á Administración galega que «concrete» esa posibilidade «e faga algo más que declaracións de intencións».
Á protesta asistiron delegados de PSdeG, entre eles a alcaldesa, María Loureiro; PP, co portavoz local, Óscar Rodríguez; Por Viveiro, cuxa representación encabezaba Bernardo Fraga; e BNG, coa asistencia da edil Míriam Bermúdez ou o deputado parlamentario Daniel Castro.