A Fiscalía pide para o acusado un ano e medio de cárcere e a inhabilitación, por catro exercicios, para calquera oficio ou profesión que teña vínculo cos animais
12 may 2025 . Actualizado á 16:37 h.Un home afronta unha pena de 18 meses de cárcere, máis catro anos de inhabilitación especial para o exercicio de calquera profesión, oficio ou comercio que teña relación cos animais e tamén o veto á tenencia dos mesmos, como acusado dun suposto delito contra a fauna. O xuízo polo caso, que tramitou o Xulgado de Primeira Instancia e Instrución número 2 de Viveiro, celebrarase este martes na Sala do Penal 1 de Lugo.
De acordo co escrito de cualificación, o acusado ten unha parcela na que se encarga de atender a patos e ocas, parcela propiedade dos seus fillos e que está totalmente pechada no seu perímetro con malla cinexética, cancelas metálicas con cadeado para impedir o acceso ao seu interior a estraños, situada en Vilaronte (Foz).
Desde «polo menos principios de novembro do 2023», expón a Fiscalía, «co obxectivo de preservar a leira de animais vertebrados, especialmente de raposos, utilizou un cepo de caza, de ferro con dentes, sendo consciente do perigo que tiña para todo tipo de fauna, e a propósito da crueldade que supón para os animais o emprego destes dispositivos ilegais».
Segundo o Ministerio Fiscal, atou o cepo «a unha árbore mediante un cable de aceiro e, a modo de cebo e para lograr máis efectividade para atraer co seu cheiro a calquera animal intruso que se coase na leira, puxo unha oca morta, para así poder capturar e desfacerse de raposos que entraban na parcela de xeito esporádico».
Así, o 25 de novembro do 2023, «un raposo que se achegou á leira quedou atrapado pola pata dianteira esquerda en el», agrega o escrito de acusación.
Ese día, sobre as cinco da tarde, persoáronse na leira axentes ambientais da Xunta de Galicia, tras recibir aviso a través do Centro de Recuperación da Fauna Silvestre. «Alí puideron observar o cepo no que se atopaba o raposo aprisionado, procedendo inmediatamente á súa liberación. Vendo que presentaba unha gran ferida, procedeuse ao traslado do animal ao hospital veterinario Rof Codina de Lugo», relata a Fiscalía.
«Examinado polo facultativo de cirurxía, o animal presentaba moita dor, unha ferida na zona lumbar e outra na extremidade anterior esquerda, compatible cun cepo, e moi infectadas e profundas. Debido á gravidade do cadro clínico e ao estado do raposo, decidiuse levar a cabo a eutanasia humanitaria», recolle o escrito. «O acusado está pendente de incoación de expediente administrativo sancionador, derivado da denuncia realizada por axentes ambientais do Servizo de Patrimonio Natural de Lugo», engade.
A Fiscalía pide tamén para o acusado o abono das custas procesuais.