A pesar do interese que espertou inicialmente, o Concello volverá sacar o procedemento de licitación ao renunciar a única oferta presentada
17 mares 2024 . Actualizado ás 14:55 h.Búscase quen xestione a cafetería bar Náutico situada xunto ao porto de Foz e de titularidade municipal. Superado o ecuador do mes de febreiro, o Concello organizou unha xornada de portas abertas para que hostaleiros e outras persoas interesadas coñecesen as instalacións recentemente remodeladas e puidesen optar a xestionalas.
A pesar da expectación e interese inicial, aínda non hai candidato nin candidata a explotalas. Segundo recoñeceu en días pasados o rexedor Francisco Cajoto, finalmente só se presentou unha oferta que pouco despois renunciou por diversas causas. Esta situación leva ao Concello ao momento de partida e a ter que volver sacar o procedemento, pasando novamente polo pleno. A idea exposta era que o contrato saíse por tres anos prorrogable a outros catro.
A cafetería bar Náutico permaneceu pechada varios anos e nos últimos o Concello realizou na mesma unha reforma integral. A xornada de portas abertas celebrada en febreiro foi un trámite máis dentro do procedemento administrativo que fixa condicións especiais de explotación; desde unha renda de 500 euros anuais (prezo de saída das ofertas) á obrigación de establecer prezos máximos para os clientes maiores de 65 anos.
«Non queriamos perder a esencia que sempre tivo o centro social como lugar de encontro de maiores, daí a necesidade de conservar o seu carácter social e con prezos razonables para eles», manifestaba entón o alcalde, que destacou entre outros atractivos da cafetería, a gran terraza sobre o porto, duns 52 metros de superficie. Lembraba que a última reforma permitiu recuperar ese espazo do que dispuña o inmoble orixinal, pero actualmente conta cun deseño renovado.
Habilitouse unha entrada totalmente independente para a cafetería do resto do edificio de Asuntos Sociais, tamén se reformaron os aseos e habilitáronse servizos para persoas con problemas de mobilidade, decorouse o lugar con fotografías antigas do edificio e doutra temática, e renováronse o mobiliario e os servizos de electricidade, de auga ou de calefacción (aerotermia) e aire acondicionado, ademais de instalar contadores independentes.
O futuro xestor deberá acabar de completar a dotación de servizos na cociña e detalles nos baños, e no prego tamén se recolle que o horario mínimo de apertura deberá ser de luns a domingo, de 9.00 a 21.00 horas.