Entre o mes pasado e a mesma mensualidade de 2022, a variación no municipio focense foi do 26,3 %, segundo Fotocasa
05 sep 2023 . Actualizado ás 13:19 h.Foz é o municipio galego onde máis subiu no prazo dun ano -desde o pasado agosto ao actual- o prezo medio da vivenda de segunda man, un 26,3 % segundo datos do Índice Inmobiliario Fotocasa.
O concello focense sitúase así por diante de Oleiros , onde a vivenda de segunda man subiu un 24,7 %, e de Cee , onde o aumento foi do 22,5 por cento. Estes tres municipios superan con moito a media dos 38 concellos analizados en Galicia. A media autonómica, segundo Fotocasa, sitúase no 4,2 %.
En canto ao prezo por metro cadrado en agosto, lideran a lista A Coruña (2.626 euros por metro cadrado) e Sanxenxo (2.597).
A provincia máis cara é Pontevedra, con 2.009 euros por metro cadrado; seguida da Coruña (1.690 euros/metro cadrado), Ourense (1.449) e Lugo (1.266).