Arden anexos con material inflamable na vivenda duns feirantes en Cangas de Foz
BARREIROS
O suceso tivo lugar ao redor das 04.30 horas do mércores e non se produciron danos persoais
13 dic 2023 . Actualizado ás 10:25 h.Efectivos dos bombeiros de Barreiros , da Garda Civil e do GES de Cervo participaron a pasada madrugada na extinción dun incendio en Foz no que ardeu unha cantidade importante de material inflamable. Segundo información facilitada polos bombeiros e polo Centro Integrado de Atención ás Emerxencias (CIAE) 112 Galicia, os feitos tiveron lugar ao redor das 04.30 horas.
As mesmas fontes precisan que os danos materiais foron cuantiosos, ardendo maquinaria de feira almacenada nas instalacións, como, por exemplo, globos de helio. No entanto, a rápida intervención dos servizos de urxencias evitou que o lume afectase á vivenda.
Pasaban escasos minutos das 04.30 horas desta madrugada cando chamou ao 112 Galicia uno dos ocupantes da casa afectada, situada no lugar de Abelairas, no camiño de A Cruz, pertencente á parroquia de Cangas. Durante a chamada, explicou que o lume comezara nun dos alpendres pegados á súa vivenda.
De inmediato, os xestores do Centro Integrado de Atención ás Urxencias activaron un operativo no que participaron Urxencias Sanitarias de Galicia-061, os Bombeiros de Barreiros, o GES de Cervo e os axentes da Garda Civil.
Os servizos de extinción traballaron no punto para controlar e apagar as chamas. Ademais, unha das persoas foi atendida no punto polos profesionais sanitarios, aínda que finalmente non tivo que ser evacuada.