Miguel Ángel Revilla será o pregoeiro da Festa da Troita da Pontenova

O Centro de Iniciativas Turísticas (Cit) da Pontenova, que este ano celebra o seu 50 aniversario, continúa configurando o programa da Festa da Troita, que se celebrará o 1 de maio. Nas últimas horas avanzaba que este ano o pregoeiro será o expresidente da comunidade de Cantabria, Miguel Ángel Revilla, con vínculos familiares por parte da súa esposa na Pontenova. En Cit facía público así o anuncio: «Miguel Ángel Revilla naceu en Salceda, concello de Poboacións (Cantabria). Pescador, economista, profesor e escritor. Foi Presidente de Cantabria. O seu carácter afable e sincero levouno a ser todo un personaxe mediático en España. Ademais ten vínculos familiares coa Pontenova. Será todo un acontecemento telo como pregoeiro. Imporáselle a Troita de Oro da Festa».

Con anterioridade a esa cita, Revilla xa foi protagonista en varios eventos na Mariña. Por exemplo, tamén foi pregoeiro da Festa do Berberecho de Foz e participou como conferenciante nos Foros de Debate do Grupo Voar en Ribadeo.

---

---

---