Abre en Ribadeo a primeira grande electrolinera da Mariña con cargadores ultrarrápidos

A Mariña conta ao fin coa súa primeira electrolinera, que se localiza nas instalacións da cooperativa CLUN, na Devesa (Ribadeo), a cen metros do acceso á autovía do Cantábrico e da praia dAs Catedrais. A unha infraestrutura de puntos de carga de coches eléctricos que segue sendo exigua na Mariña súmase esta primeira instalación con oito torres e potencias de carga ultrarrápida, o que constitúe a gran novidade e vantaxe, e que ademais pola súa localización ofrece aos condutores outros servizos, como o economato de CLUN, unha lavandería e tamén unha gasolineira tradicional, entre outros.

A apertura demorouse máis do previsto, xa que a finais do ano pasado a obra civil xa estaba aparentemente concluída e fontes de CLUN manifestaban que a apertura só dependía xa de cumprir os últimos requisitos.

Esta electrolinera conta con oito estacións de carga, con bandeira de Iberdrola/bp pulse e Porsche Ibérica, quen no ano 2020 asinaron un convenio para crear a maior rede de estacións de recarga ultrarrápida do sur de Europa.

Dentro deste acordo contemplábase a instalación de cargadores ultrarrápidos de ata 400 kW por todo o territorio nacional, formando unha rede que cubrise as principais estradas e permitise viaxar sen problemas por toda España. Neste marco sitúase a electrolinera de CLUN na Devesa.

Dous dos postes dos cargadores son ultrarrápidos, de 360 kW, que proporcionan unha potencia moi alta para recargar a batería nun tempo marca, en menos de trinta minutos. Os outros cargadores son de 180 kw e 50 kw CHAdeMO.

Ademais da electrolinera de CLUN, no polígono industrial de Ribadeo constrúe outra Iónity, un proxecto que se comezou a xestar no ano 2022, cando Iónity pagaba a Sepes 67.105 euros para facerse cunha parcela de 1.485 metros cadrados no polígono ribadense, xunto á ligazón da A-8. Ía ser a primeira electrolinera en Ribadeo, pero finalmente a de Iberdrola/bp, Porsche Ibérica e CLUN adiantóuselle. As instalacións que monta Ionity tamén son ultrarrápidas, cunha potencia de ata 350 KW.

Ademais destas dúas electrolineras, en Ribadeo Wenea xa abriu hai meses unha estación con tres puntos de carga na chaira do restaurante El Huerto, en Vilaframil.

Wenea tamén conta con outro posto con tres estacións de carga no Hotel As Sirenas,en Viveiro, pero ambas as son de menor potencia (ata 100 kw). Os puntos de carga están cada vez máis xeneralizados na comarca. Hai tamén, por exemplo, no Parador de Turismo ribadense, para clientes, ou no Burger King (100 kW e 80 kW CHAdeMO).

---

---

---