Míriam Bermúdez: «O PP votou no Parlamento en contra de que a Xunta asuma o Conservatorio de Viveiro pese a presentar 9.000 sinaturas»

A portavoz do BNG en Viveiro, Míriam Bermúdez, critica que o Partido Popular «impedise» que a Xunta asuma o Conservatorio Profesional de Música de Viveiro «ao votar en contra da proposición non de lei presentada polo BNG no Parlamento galego, a través da deputada Cristina Fernández Davila». Presentáronse case 9.000 sinaturas en apoio a esta demanda, das cales máis de 6.000 foron recollidas polo profesorado, alumnado e familias do Conservatorio de Viveiro semanas atrás, tal como lembrou Míriam Bermúdez, concelleira e portavoz do BNG na corporación de Viveiro.

«Actualmente 23 concellos galegos están a soportar en solitario o custo da educación musical profesional, a pesar de que a Consellería de Educación é a encargada de expedir os títulos oficiais. No caso de Viveiro, o Conservatorio Municipal supuxo en 2023 un gasto de 1.141.676,22 euros para o Concello, unha carga económica que compromete recursos fundamentais para outros servizos públicos», sinalou Bermúdez.

«Non é razoable que Viveiro teña que asumir en solitario esta responsabilidade. É o momento de que a Xunta actúe; o goberno galego non pode permanecer impasible mentres os concellos quebran pola falta de apoio económico. Non se pode tolerar que un servizo supramunicipal sexa asumido exclusivamente polos concellos onde se sitúan os conservatorios», criticou.

O BNG insta á Xunta «a poñer en marcha un plan para integrar os Conservatorios Municipais na súa rede oficial garantindo un financiamento adecuado e un acceso igualitario á educación musical para toda a poboación».

«Ademais -lembra Míriam Bermúdez- no acordo da moción de censura, Por Viveiro pediu ao PP que asumira o 30% do custo do Conservatorio, o que suporía unha achega de 350.000 euros. Polo tanto, esperamos ver ese compromiso materializado».

---

---

---