Os organizadores das festas do Bispo Santo de Foz prepararon un completo programa, con moita música, para unha edición especial
26 mar 2025 . Actualizado á 13:59 h.A fin de semana forte da próxima edición da romaría focense do Bispo Santo será os días 9, 10 e 11 de maio, aínda que o programa de actos xa arrincará o domingo 4 de maio, ás 17 horas, cunha misa e o traslado da imaxe desde a basílica de San Martiño ao Monte dá Grela, xunto á ermida de San Gonzalo.
A organización desta festa, que abre desde San Martiño a tempada de romarías tradicionais na Mariña, preparou unha edición especial e anuncia un completo cartel de actos. O 9 de maio subirase ao escenario da festa o grupo Mar de Arousa ao que lle seguirá O Combo Dominicano.
O sábado 10 haberá misa (13.30 horas) e procesión, seguida de sesión vermú coa orquestra Principal. Pola tarde animará a festa o grupo de gaitas Dambara. Para os máis pequenos actuará o mago Paco e tamén se sorprenderán coas novidades de Espectáculos Ledicias. A tarde seguirá chea de sorpresas con actuacións de dúas dj's cuxo nome aínda non foi desvelado. A festa continuará pola noite coa orquestra Principal e o Grupo Beatriz.
O domingo 11 actuará na sesión vermú o dúo Belinda e a charanga Louband Street Band. Para pechar o programa, o domingo 18 de maio farase o traslado da imaxe novamente cara á basílica.
Desde a organización avanzan que haberá grande acampada, adiantan que cada caseta pagará 10 euros por enganche de luz e que Polbeira A Rochela de Vilalba servirá comida os tres días na romaría.