Nin unha viaxe en balde do San Ciprián: o único invicto a domicilio en todo o fútbol lucense
A MARIÑA
Apunta ao «play off» de ascenso en Segundo Galicia cun 50% máis de puntos e goles lonxe da Veiga
10 abr 2024 . Actualizado á 05:00 h.Nin unha soa viaxe en balde. É a filosofía que permite ao CD San Ciprián agarrarse ao play off de ascenso en Segundo Galicia. O seu irregular rendemento na Veiga, onde só gañou un dos seus cinco partidos desde o comezo do 2024, contrasta coa condición de único conxunto sénior da provincia de Lugo invicto a domicilio. En 12 partidos na casa sumou 18 puntos, un 48,66% menos dos 29 acumulados en 13 saídas, e anotou 15 goles, cunha media por encontro un 53,6% inferior aos 25 celebrados fóra. De visitante tamén encaixa menos: dez goles contra 13.
«Somos un equipo ao que lle gusta moito competir, que non se amilana contra ninguén en ningún campo», apunta o seu adestrador, Jaime Méndez, sobre o brutal rendemento a domicilio dun conxunto azulón que logrou cinco empates contra Cabreiros (1-1), Cospeito (0-0), Xermade (3-3), Folgueiro (1-1) e Pastoricense (1-1), e oito vitorias, as catro últimas consecutivas, ante Roupar (0-1), Racing Vilalbés (0-1), Muimenta (1-4), Mondoñedo (1-3), Comercial (0-3), Abadín (1-3), Candelaria (0-2) e Iberia (1-2). Sporting Pontenova e Alfoz serán as súas dúas últimas saídas na fase regular do grupo norte de Segundo Galicia en Lugo.
«Somos un equipo ao que lle gusta moito competir, que non se amilana contra ninguén en ningún campo», destaca o adestrador, Jaime Méndez
«Que nos custe máis sacar os partidos da casa xa pasou outros anos. Non nos vén moi ben ter céspede artificial, temos xogadores que nunca xogaran nel. Non creo que sexa unha cuestión de presión nin nada diso», xustifica un técnico a cargo do equipo azulón desde o curso 2021/22. «Quizais tamén nalgúns partidos acusamos que xeramos moitas ocasións e nos custa convertilas. Os rivais respéctannos e moitos se plantaron aquí con defensas moi poboadas; fóra énos máis fácil atopar espazos», engade.
Tras descender o pasado curso de Primeira Galicia, unha categoría que recuperaran no 2022, a cinco xornadas de pechar a liga sitúanse cuartos, coa única praza de promoción directa case imposible —a Pastoricense sácalles 14 puntos— e preto de pechar o seu lugar entre os catro conxuntos que xogarán por outro ascenso no play off. «Hai tempo que nos centramos en preparar a fase de ascenso o mellor posible. Imos recuperando xogadores que estaban con lesións ou cargados de tarxetas e queremos chegar coas mellores sensacións», destaca Méndez.
O peso dos capitáns
«Tras descender o ano pasado, logramos manter o bloque. Somos un club que coida ben aos xogadores. Sabíamos que o ascenso directo ía ser complicado, pero queremos competir, estar arriba», engade o burelense sobre un equipo onde ve clave a achega do porteiro Mada, o centrocampista Antón e o pichichi Borja Mella, con 13 goles, non só polo seu rendemento no campo. «Hai dous anos fixemos un cadro xuvenil e o noso gran obxectivo é asegurar o futuro deste equipo, non ser só unha xeración moi boa, como a de Mada, Antón e Borja. Eles son moi importantes para os rapaces da canteira porque son estandartes do San Ciprián e teñen experiencia en divisións superiores», relata Jaime.
A súa última vitoria, 1-2 ante un Iberia que contaba as súas aparicións nAs Vallas por triunfos, reforza a moral das súas tropas: «Na primeira metade eles notaron a presión de que se xogan máis, están preto do ascenso directo, fomos mellores e adiantámonos, pero despois sufrimos. Xeraron moito desde centros e remates, Mada estivo espectacular e acabaron empatando. Despois quedámonos con dez pola expulsión de Borja Mella e, con eles volcados, Racha meteu o 1-2 no 89 tras un pase de Gio. Aínda tivemos que aguantar 12 minutos máis de tempo engadido. Foi tenso e moi duro».