Concellos mariñáns ofertan prazas de administrativos, peóns ou arquitectos técnicos
A MariÑA
Varios Concellos mariñáns teñen en marcha procesos de contratación, algúns ao amparo de plans provinciais
26 mares 2024 . Actualizado ás 12:25 h.Ademais de anunciar a cobertura de prazas concretas, varios Concellos mariñáns teñen abertas diferentes bolsas parar cubrir persoal en época de vacacións, para substitucións ou por baixas. Neste caso concreto, o de Foz ten publicadas as bases e os anexos que regulan a selección de persoal para a bolsa da praza de orientador laboral e de técnico de recursos humanos.
En canto aos contratos que ofertan, o Boletín Oficial da Provincia publicou este luns as bases da convocatoria de dúas prazas de auxiliar administrativo da escala de administración xeral polo sistema de oposición libre.
A área municipal de Obras do Concello de Burela tamén lanzou a convocatoria para contratar a dous peóns ao amparo do programa Reforzo do Emprego, integrado no Plan Provincial Único de Cooperación cos Concellos. A duración dos contratos será por seis meses, co límite temporal do 31 de outubro.
O Concello de Lourenzá publicou este luns as bases reguladoras do proceso de selección para contratar a traballadores desempregados para cubrir unha praza de tractorista mediante o sistema de concurso-oposición, tamén ao amparo do Plan Único de Cooperación cos Concellos.
No Diario Oficial de Galicia deste luns tamén se publicou o anuncio da convocatoria para a provisión dunha praza de arquitecto técnico para o Concello de Alfoz, lembrando que no BOP do 27 de febreiro publicáronse as bases reguladoras da convocatoria e de selección polo procedemento de concurso-oposición e en quenda libre. O prazo de presentación de solicitudes será de vinte días hábiles, contados desde o seguinte ao da publicación do anuncio de convocatoria no Boletín Oficial do Estado.
Tamén o Concello de Vegadeo anunciou en días pasados a convocatoria e as bases do proceso para contratar a un arquitecto superior dentro de a convocatoria de concesión de subvencións a concellos do Principado de Asturias para facer contratos formativos para que os mozos adquiran práctica profesional.