O paso, un dos máis queridos da Semana Santa viveirense, será presentado este sábado na apertura da Antesala dun Museo
19 mar 2024 . Actualizado á 08:46 h.Jesús, a figura principal, xunto con Pedro, Santiago o Maior, Andrés, Juan, Felipe, Bartolomeu, Tomás, Mateo, Santiago o Menor, Simón, Judas Tadeo e Judas Iscariote, os doce apóstolos da Última Cea, un dos pasos máis queridos da Semana Santa de Viveiro, declarada de Interese Turístico Internacional, estrearán roupaxes este ano despois de medio século. Así o confirmou este luns o ministro da Venerable Orde Terceira (VOT) Franciscana, o sacerdote Juan José Novo Gabeiras, que avanzou que unha empresa de Zaragoza especializada na fabricación e confección de artigos relixiosos encargouse de preparar as novas vestimentas. «A última modificación dos traxes fixérase na década dos setenta, e había mantos moi deteriorados, moi estropeados por algunha molleira cando choveu nalgunha procesión..., así que decidimos cambialos», precisou Gabeiras.
Unha das novidades serán os materiais. Todos os traxes anteriores eran de veludo, mentres que os novos lucirán unha variedade máis ampla. Haberá veludos, pero tamén brocados, rasos ou damascos que darán forma a túnicas ou chalecos ao estilo da época. A proposta será financiada con fondos propios da VOT, así como con axudas.
«Había traxes moi deteriorados polas molleiras que pillaron nalgunha procesión que choveu», Juan José Novo Gabeiras, sacerdote e ministro da VOT Franciscano
O paso da Última Cea, que conta cunha procesión propia o Xoves Santo, data do ano 1808 e foi tallado por Juan Sarmiento, escultor de San Cibrao que se inspirou en mariñeiros deste porto mariñán para esculpir os rostros dos apóstolos. Permanece custiodiado durante todo o ano na capela da VOT, no interior da igrexa de San Francisco. As novas vestimentas serán dadas a coñecer ao público o vindeiro sábado, durante a apertura da carpa Antesala dun Museo, na que se exporá unha parte da rica imaxinería da Semana Santa viveirense. «Hai que xogar un pouco coa novidade ó tempo que se traballa para seguir conservando o patrimonio», defende Novo, que conta que a «bolsa de Judas», na que este apóstolo «garda» as 30 moedas que recibiu por traidicionar a Jesús, e que un dos elementos máis curiosos do paso, será «a de sempre».
Charla do arcebispo de Santiago
O arcebispo de Santiago, Francisco José Prieto González, ofreceu este luns no Teatro Pastor Díaz unha charla dentro do programa Adral, organizada pola Xunta de Confrarías. No acto tamén se presentou revístaa-pregón deste ano, que inclúe a programación oficial. foto pepa losada