Detidos tres integrantes dunha banda organizada que roubaba en vivendas e empresas da Mariña

Tres persoas foron detidas en o marco da operación Alavanca desenvolvida pola Garda Civil. Son integrantes dunha banda organizada e foron detidos como supostos autores de roubos con forza nas cousas na comarca mariñá e noutros municipios da provincia.

Segundo a información divulgada por fontes oficiais, a investigación comezou no primeiro semestre do 2022 tras os roubos cometidos en vivendas habitadas de Xove e Barreiros, continuando en empresas situadas ao longo da provincia lucense, en municipios como A Pontenova, Mondoñedo, A Pastoriza, Carballedo e Baralla.

Dous veciños de Lugo, de 31 e 38 anos, foron detidos nunha primeira fase da operación tras reunirse suficientes indicios contra os presuntos autores destes roubos. Proseguiron as pescudas e posteriormente detívose ao último integrante, tamén veciño de Lugo e de 47 anos. 

Neste operativo policial esclarecéronse sete delitos de roubo con forza e un en grao de tentativa. A organización actuaba en vivendas habitadas, empresas e establecementos públicos.

Desde a Garda Civil confirmaron que se realizaron varios rexistros e nos mesmos interveuse un arma de fogo e gran cantidade de material, como tamén xoias e maquinaria. As mesmas fontes indicaron que se recuperaron a maior parte dos obxectos roubados, que están a disposición dos propietarios. Estiman que o valor do recuperado rolda os 13.000 euros.

As persoas detidas foron postas a disposición xudicial.

---

---

---