A planta de Cervo, lista para recibir os biorresiduos dos Concellos, que teñen pouco máis dun mes para cumprir coa normativa
A MARIÑA
O Concello cervense foi polo momento o único en usar o servizo, segundo confirmaron desde a consellería
23 nov 2023 . Actualizado á 13:07 h.A planta para tratar biorresiduos do polígono cervense de Cuíña foi construída para dar servizo aos Concellos da comarca. De acordo coa normativa europea, os Concellos están obrigados a implantar a recollida diferenciada de materia orgánica antes do próximo 31 de decembro, pero por agora só o Concello de Cervo estreou o centro habilitado para tratar estes biorresiduos.
Así o confirmaron este mércores desde a Consellería de Medio Ambiente, lembrando que a Xunta, a través de Sogama, proxectou, edificou e puxo as instalacións ao dispor das Administracións locais «coa finalidade de axudarlles a cumprir coa lei». Precisan que agora é a quenda dos Concellos: «A xestión dos residuos é unha competencia municipal, polo que son os Concellos os que deciden cando queren ou poden comezar a entregar a súa materia orgánica na correspondente planta».
Na maioría dos Concellos mariñáns, tamén en colaboración coa Mancomunidade, realizáronse campañas para informar os veciños da implantación do novo servizo de recollida selectiva. En ningúns, como o de Xove, xa anunciaron onde se instalarán en zona urbana os colectores específicos para este servizo e como se deben utilizar.
Desde Medio Ambiente insisten en que a implantación do quinto colector e a recollida dos biorresiduos en cada termo municipal dependerá das decisións que adopten os Gobernos locais. «O papel de Sogama consiste en tratar a materia orgánica que chega procedente dos concellos para transformala en compost. Neste sentido, o Concello de Cervo xa realizou a primeira entrega de materia orgánica porque tiña toda a infraestrutura lista -contaba cos contedores necesarios- e xa realizara previamente campañas informativas e de concienciación dirixidas á veciñanza», indican desde o Goberno galego.
O resto dos Concellos deberán contactar con Sogama cando estean preparados para facelo. «Facilitóuselle aos Gobernos locais tanto un escrito explicativo da dinámica a seguir como un borrador de convenio para a posta en marcha do servizo», sosteñen desde a consellería.