Prestará servizo a outros 14 concellos da zona
11 nov 2023 . Actualizado á 12:20 h.O Concello de Cervo foi o primeiro en estrear a planta de biorresiduos construída no polígono cervense de Cuíña e que dará servizo a outros 14 concellos.
Cervo repartiu unha vintena de colectores marróns en distintos puntos do municipio para favorecer a reciclaxe de materia orgánica nos fogares. Os interesados poden solicitar no Concello unha chave para depositar os residuos neses recipientes.
Na planta, cun investimento que roldou os 6,4 millóns de euros, realízase todo o proceso de compostaxe (pretratamiento, fermentación, maduración e almacenamento), ten capacidade para tratar 3.000 toneladas anuais de materia orgánica, ademais de 1.600 toneladas de material estructurante, como son podas e restos de madeira), «estimando unha produción de 1.500 toneladas de compost, cuxo destino será fundamentalmente a agricultura e a xardinería, en substitución dos fertilizantes artificiais», avanzan desde o Concello.
Lembran que está en marcha a campaña informativa «Súmate ao Marrón, ten moita vida», a través da que se achega información que os veciños cervenses completan co folleto explicativo que o Concello lles enviou aos seus fogares, onde se localizan os puntos dos colectores marróns.
A alcaldesa cervense, Dolores García Caramés; a concelleira delegada de Medio Ambiente, Manuela Méndez Álvarez; o edil da Zona Rural, Adrián Arias e o presidente de Sogama, Javier Domínguez Lino presenciaron este mércores a primeira entrega de materia orgánica na instalación por parte do servizo municipal de recollida de lixo.