«Cada patrón de pesca que saia do IES María Sarmiento, do novo ciclo de FP Dual do Mar, creará 30 empregos na comarca»
A MariÑA
Din que en 4-5 anos non haberá barcos se non saen novos patróns. O IES viveirense, a Confraría de Pescadores e Porto de Celeiro poñen en marcha un innovador ciclo dual pesqueiro e a inscrición ábrese este venres
22 jun 2023 . Actualizado ás 22:31 h.«Cada patrón de pesca que sexamos capaces de sacar do IES María Sarmiento creará 30 postos de traballo na Mariña: os 15 do barco que dirixa e outros 15 en terra. Somos unha provincia líder en pesca fresca, con ABSA e Porto de Celeiro á cabeza, e a importancia que ten isto para a comarca é tremenda». Con este resumo resaltou este mércores o director de Proxectos de Porto de Celeiro, Manuel Bermúdez Díaz, a relevancia do ciclo formativo dual de Navegación e pesca de litoral que, a partir do próximo mes de setembro, impartirá este instituto viveirense en colaboración coa Confraría de Pescadores e Porto de Celeiro. As consellerías de Educación e Mar da Xunta de Galicia aceptaron desenvolver un ciclo que prevé contribuír «a que a pesca continúe sendo o pulmón económico» dunha comarca que conta con dúas dos portos máis importantes do Cantábrico: o de Celeiro e o de Burela .
«Pese ás dificultades, é un sector con presente e con futuro, e unha inserción laboral do cen por cen. A titulación de puente e de máquinas de barcos de pesca ten un salarios atractivos e unhas condicións boa», subliñou o secretario da confraría celeirense, Máximo Díaz, que encomiou a «tradición pesqueira» da comarca, e confía en que o innovador ciclo se converta «en referencia para A Mariña e Ortegal».
«En Foz e en Celeiro houbo escolas náutico-pesqueiras, pero hai moito que se lle dá a espalda ó mar no ámbito formativo», apuntou o xefe de estudos de nocturno do IES María Sarmiento, Ramón Cajoto, que levou a cabo parte das xestións.
Díaz e Cajoto quixeron recoñecer o apoio brindado desde as administracións á hora de pór en marcha un proxecto no que tamén «creu» a anterior xefa territorial de Educación, Mariña Gueimunde (actual portavoz do PP en Viveiro ). «É algo no que crin desde o principio porque é un sector que deu moito traballo e moitas alegrías, e hai que achegar para que haxa substitución xeracional», resaltou Gueimunde, que ademais é profesora no María Sarmiento.
«En 5 anos, na Mariña, case non vai haber ningún patrón de pesca porque se xubilan todos coa xeneración do ‘baby boom'», Máximo Díaz, secretario da Confraría de Pescadores Celeiro
«Levamos dous anos de xestións para conseguir este ciclo, no que a inserción laboral será do cen por cen», Ramón Cajoto, xefe de estudos nocturno IES Mª Sarmiento
«Non foi doado conseguilo, houbo que loitar moito, pero temos que axudar a que haxa substitución xeracional na pesca de Celeiro e Burela», Mariña Gueimunde, anterior xefa territoral de Educación
Quen aproben o título poderán desempeñar funcións de patrón costeiro polivalente, local de pesca; patrón, primeiro oficial e oficial de puete en buques mercantes, pesqueiros ou de pasaxeiros; mariñeiro pescador ou de ponte, inespector de flota ou supervisor de montaxe de artes e aparellos de pesca, entre outros. A exercer en empresas públicas ou privadas. O título permitirá o acceso a calquera ciclo formativo de grao medio ou superior.
Ata 22 alumnos que terán clases teóricas en terra de setembro a marzo, e embarcarán de marzo a agosto
O ciclo formativo de Navegación e pesca de litoral ofertará un máximo de 22 prazas. Por agora hai confirmados 12 postos de traballo en barcos que van acoller alumnos. Non en balde, durante os dous cursos académicos que dura o ciclo, os alumnos asistirán a clases en terra desde setembro ata marzo, e logo continuarán a formación nun barco de pesca ata o mes de agosto. Con ese obxectivo asinaranse convenios con empresas, como apuntou a responsable de FCT (Formación en Centros de Traballo) do IES María Sarmiento, Ana Belén Martínez Cerdeiras. O tempo que pasen embarcados contabilizará como «días de mar». A titulación que obteñan permitiralles navegar desde o norte de Irlanda, en augas de Gran Sol, ata Mauritania.
O prazo de inscrición ábrese o 23 de xuño e pecharase o 5 de xullo
As persoas interesadas en inscribirse no ciclo formativo dual de Navegación e pesca de litoral poderán facelo a partir deste venres, 23 de xuño, ata o 5 de xullo. Poderán informarse tanto no IES María Sarmiento, como na Confraría ou o Porto de Celeiro. Os requisitos de acceso son: ter máis de 16 anos e ter o título de ESO ou unha titulación equivalente. Nese sentido, os promotores do ciclo sinalan que esta formación supón «unha oportunidade única», da que tamén se poderán beneficiar persoas que xa traballan no sector pesqueiro, e que deste xeito poderán «promocionar» e conseguir un posto con mellores condicións laborais e salariais.