Vellas glorias do Real Madrid e personalidades na homenaxe a Luis de Carlos en Viveiro
A MariÑA
Comparten un xantar previo ao partido Real Madrid Castela e Club Deportivo, que se disputa ás sete da tarde deste sábado en Cantarrana
02 ago 2019 . Actualizado ás 19:05 h.En Cantarrana Real Madrid Castela e Club Deportivo Lugo serán, a partir das sete da tarde deste sábado, os protagonistas futbolísticos da homenaxe que Viveiro rende ao expresidente do club branco Luis de Carlos Ortiz no 25 aniversario do seu falecemento. Aínda que, ao mesmo uníronse un bo número de autoridades e históricos exfutbolistas que xa se reunirán nunha comida no Restaurante Nito. Nela estará representado o Concello de Viveiro a través da alcaldesa María Loureiro, a Xunta con José Manuel Balseiro e tamén todos os clubs implicados. Asistirán o exportero madridista Agustín, gañador do Trofeo Zamora en 1983 e que disputou a final da Copa de Europa ante o Liverpool; Antonio Ruiz, un dos poucos pentacampeones de Europa brancos aínda vivo; a directora da Fundación internacional Real Madrid, Rosa Roncal; o directivo Manel Otero Lastres; o presidente do Lugo, Tino Saqués, membros da xunta directiva do Viveiro; familiares de De Carlos e outras personalidades como o escritor Ramón Pernas ou José Manuel González Páramo, directivo do BBVA.
Florentino Pérez
«Ata última hora e dependendo dos acontecementos», sinalan desde a organización, non descartan que asista o presidente do Real Madrid, Florentino Pérez, así como un director xeral do club, Manuel Redondo.