Vaise tras conquistar a Liga de Primeira e a Copa de España
08 jun 2013 . Actualizado ás 07:00 h.Anunciábao onte o Burela FS nun comunicado de prensa: Javier Pardeiro, o técnico que acaba de facer historia no club á fronte do equipo feminino cun dobrete memorable, non seguirá nas filas laranxas.
Vaise tras conquistar nin máis nin menos que a Liga de Primeira División do fútbol sala feminino nacional e a Copa de España. Un dobrete, insistimos, histórico. Puxo a Burela, ao Burela FSF Pescados Rubén, á Mariña, no máis alto do fútbol sala español. Como escribimos no seu día, non fai moito, co gallo da consecución do título de Liga : desde Burela conquistou España. A Liga recoñeceullo designándolle mellor adestrador da tempada do fútbol sala feminino. Agora finalizou o seu contrato e segundo explicaba onte a directiva, «o presidente, Manuel Blanco , e o vicepresidente José Luis Sáez, comunicáronlle a decisión dos responsables da entidade de non renovarlle».
«Despois de reflexionar sobre a orientación do proxecto, chegamos á conclusión de que este é o momento de pór fin a un ciclo e pensar en novas metas e expectativas», expoñen os directivos.
«A pegada que deixa Javier Pardeiro será indeleble», din, polos éxitos de agora e o seu traballo nas sete tempadas tamén no equipo masculino.
«Estamos seguros de que o seu futuro estará repleto de proxectos apaixonantes que lle axudarán a seguir crecendo nun deporte polo que sente devoción», conclúen.
javier pardeiro non seguirá no club burelense