María Vázquez, nomeada ao Goya á mellor actriz principal, pregoará a Festa do Queixo de Arzúa

A edición número corenta e nove da Festa do Queixo, que se celebrará en Arzúa a primeira fin de semana de marzo, terá unha pregoeira de cine. Á actriz María Vázquez, natural de Vigo, encomendoulle a organización da cita gastronómica, que recae no Concello arzuán, a elaboración e lectura do pregón de apertura da festa, que quedará oficialmente inaugurada o sábado, 2 de marzo, ás 11.45 horas. A elección da intérprete galega como pregoeira da presente edición da Festa do Queixo chega nun dos mellores momentos da súa traxectoria profesional, que iniciou en series para televisión de produción nacional, como Ao saír de clase ou Compañeiros, e continuou en ficcións galegas, como Fíos ou Padre Casares.

Foi no ano 2000 cando María Vázquez deu o salto ao cine da man do finado director catalán Joan Potau. Tras actuar despois baixo as directrices de cineastas como Icíar Bollaín, Montxo Armendáriz ou Gerardo Diego, o seu papel en Matria, o filme do director vigués Álvaro Gago que desmonta o mito da meritocracia, valeulle un nomeamento á mellor actriz protagonista nos Premios Goya 2024. O fallo da Academia do Cine Español coñecerase na gala que este sábado pola noite se celebra en Valladolid . O papel que interpreta na cinta que dirixe o seu paisano, o dunha traballadora que sobrevive nun precario mercado laboral, tamén lle valeu un nomeamento na última edición dos Premios Feroz.

Como pregoeira da Festa do Queixo, María Vázquez súmase a unha lista nutrida de recoñecidos galegos no mundo das artes, a cultura, o deporte e o xornalismo, como, entre outros, os actores Tamar Novás (2023) e María Castro (2017), a poeta Yolanda Castiñeiro (2007), o ilustrador Xaquín Marín (2008), a triatleta paralímpica Susana Rodríguez Gacio (2022), ou o finado xornalista Nacho Mirás (2015).

---

---

---