Diego Rivas conta xa con ficha para converterse na primeira opción dos carballiñeses para cubrir o seu marco no derbi do próximo domingo
26 abr 2024 . Actualizado ás 12:28 h.O culebrón sobre a identidade do gardameta que presentará o Arenteiro o vindeiro domingo en Riazor para medirse ao Deportivo comeza a disipar incógnitas, posto que o club de Espiñedo diligenció a licenza como futbolista de Diego Rivas, o seu adestrador de porteiros.
O de Narón afronta no Carballiño a súa primeira experiencia como técnico, no papel de asistente de Javi Rey e ocupándose tamén do adestramento específico dos homes que actúan baixo paus. Despois de 180 partidos disputados en Segunda B, Segunda División e Primeira Federación, despediuse nesta última categoría, co ascenso do Racing de Ferrol. O seu último duelo disputouno en novembro do 2022, dentro do calendario da Copa do Rey , en Sestao.
Rivas cumprirá 37 anos o próximo maio e a súa actuación sería puntual, á espera do que decida o cadro técnico e a dirección deportiva do conxunto verde nas próximas horas. Pablo Brea está apto para xogar, pero unha cuestión económica pode apartalo do once, mentres que Manu Figueroa sae dunha lesión. Todas esas circunstancias motivaron un auténtico cisma nas oficinas da entidade, que mesmo recorreu ao mercado, ao cebarse os problemas nesa posición determinada do cadro de persoal.
DIEGO GARCÍA
Baixa por unha rotura do tendón de Aquiles. A espectacular tempada do meta ourensán, Zamora en Terceira e en Segunda Federación, rematou de modo abrupto coa súa grave lesión no Johan Cruyff de Barcelona. Atrás quedaron 10 porterías a cero nos 27 partidos que disputou antes desa data, contribuíndo de modo decisivo aos bos resultados do seu equipo. A súa facilidade para xogar o balón co pé foi outra das claves dos esquemas expostos por Javi Rey . Ten por diante seis meses de recuperación, tras a intervención cirúrxica do doutor Adrián Galego.
PABLO BREA
Unha cláusula dificulta a súa aparición no derbi. O porteiro de Calo chegou ao Carballiño cedido polo propio Deportivo, incluíndo nas cláusulas do acordo o pagamento dunha penalización que debe abonar o club de Espiñedo se Brea salta ao campo ante os branquiazuis. De feito, foi incluído na convocatoria do choque da primeira volta, como suplente, e en caso de necesidade podería viaxar a Riazor. De todos os xeitos, na propia entidade verde xa sinalaron que a cantidade económica trastornaría o seu balance orzamentario e seguen estudando a conveniencia de contar ou non cos seus servizos. Ata a data, xogou en Copa e disputou seis partidos da liga regular, encaixando tres goles e con outras tantas porterías a cero. Desde a lesión de Diego García foi o titular e demostrou atravesar un bo momento de forma, a pesar de que sufriu un golpe nunha cella en Cornellá, con tres puntos de sutura.
MANU FIGUEROA
Intenta recuperarse dunha forte escordadura de nocello. O vigués forxado na canteira céltica é unha das apostas de futuro do Arenteiro, despois de pasar polo Val Miñor e o Coruxo. O seu primeiro ano en Espiñedo xogoulle unha mala pasada coa inoportuna lesión que sufriu despois de ir convocado en 27 partidos do torneo regular, sen chegar a xogar nin un minuto. Fisioterapeutas e readaptadores intentan que poida estar dispoñible para o vindeiro domingo, aínda que se antolla complicado que chegue nas mellores condicións para xogar.
PABLO PICÓN
Fichaxe frustrada ao final. A alternativa do gardameta valenciano foi unha solución tan rápida como infrutuosa. Tras iniciar a campaña co filial do Valladolid en Segunda Federación, atopábase no paro e parecía un movemento fiable tras as lesións de Diego e Manu, pero a súa baixa non foi executada en tempo e forma. O trámite incompleto deixou aos carballiñeses cun só porteiro en Cornellá, situación que se repetiu á semana seguinte contra a Ponferradina.
FILIAL O Juvenil
Óscar Ferradás, opción do Arenteiro B. Co filial na segunda categoría provincial, podería aliñarse ao ser menor de 25 anos, requisito que non cumpre o titular. Con todo, a experiencia deses gardametas é nula, máis aló da competición ourensá.