A parrillada Milongas abrirá as súas portas a finais de abril, no local onde durante os últimos cinco anos estivo a cafetería Sobre Faragullas
26 mares 2024 . Actualizado ás 05:00 h.A cafetería Sobre Faragullas, situada no número 63 da rúa do Progreso de Ourense , pechou dun día para outro a mediados do mes de xaneiro. A explicación que daba o seu propietario, Eduardo Vidacovich, naquel momento era que un grupo de hostalería moi potente ofreceulle o que pedía para vender o espazo. O local, especializado en bollería e cafés, levaba cinco anos nese punto da cidade. As obras de reforma do baixo comezaron en febreiro e o novo proxecto está case listo. Trátase dun restaurante Milongas, unha cadea de parrilladas con orixe arxentina. Os pais de José Ribas, o fundador da marca, emigraron a Buenos Aires e alí naceu el, que regresou a Galicia no 2001. Abriu a súa primeira parrillada ao pouco tempo en Milladoiro e o primeiro Milongas púxoo en marcha en Bertamiráns no 2016. O concepto é moi sinxelo. «Somos unha churrasquería como as de toda a vida, pero modernizada, cunha atención coidada e unha carta sinxela con menús pechados», explican desde a cadea. Precisamente ese é un dos puntos fortes deste novo restaurante, que abrirá as súas portas cara a finais de abril no centro da cidade. En Milongas ofrecen un menú, o campeiro, que permite comer ata cansarse por 17 euros. Inclúe churrasco de tenreira, de porco, segredo, criollos, patacas, ensalada e sobremesa.
O de Ourense será o sétimo restaurante da empresa galega, que tamén conta con locais na Coruña, Poio, Vigo e Vilagarcía, ademais dos de Milladoiro e Bertamiráns. «Estamos traballando para ter presenza na maioría de cidades galegas. Na provincia ourensá aínda non tiñamos aberto nada e comezamos pola capital, onde hai moito movemento», afirman.
A parrillada Milongas é un local perfecto para carnívoros. Ademais do menú campeiro, fan chuletón de vaca ao peso, chuleta de tenreira galega ou croca. Tamén teñen prato do día e unha proposta especial para os máis pequenos. «Os nosos restaurantes son unha opción perfecta para familias, xa que ademais do menú infantil, temos sempre unha zona de xogos e coidamos todas as comodidades», aseguran. O seu antecesor no baixo de Progreso, Sobre Faragullas, tamén tiña habilitado un espazo do local para que os nenos puidesen xogar e entreterse.
Segundo asegura a empresa de parrilladas, nos próximos días comezará o proceso de selección para formar o equipo de profesionais que atenderá no Milongas de Ourense.