O Campionato Galego de Trial celébrase esta mañá desde as dez
23 abr 2017 . Actualizado ás 15:28 h.Un escenario mítico que regresa ao calendario autonómico despois de máis dunha década para coroar ás promesas máis firmes do trial galego. O monte arteixán de Subico citará a partir das dez desta mañá a unha trintena de pilotos de cinco categorías co gallo de a terceira proba do Campionato Galego de trial tras as disputadas en Bueu e Entrimo.
En ambas dominou con absoluta autoridade o coruñés Alén Damil, que lidera grazas a iso a categoría reina (TR1) con 50 puntos, seguido de Yago Armesto e Martín Riobó (os dous con 36).
Será, sin duda, o home a bater na carreira por facerse cun certame autonómico ao que lle faltan por disputar as probas de Culleredo (7 de maio), O Grove (21 de maio), Lugo (4 de xuño), O Porriño (8 de outubro) e Aldán (5 de novembro).
Chega como líder de TR2 Anxos Leirós, mentres que Antonio Pérez é o primeiro clasificado en TR3 e Carlos Alvez en TR4. A categoría de xuvenís, TR5, está comandada por Gabriel Costa.
A organización, que corre a cargo do Trial Club Coruña e do Moto Club Saltamontes, agarda unha gran afluencia de público, sobre todo nas cinco primeiras zonas, situadas na área de Subico no val de Loureda. «Deu moito traballo recuperar esta cita, pero supón tamén unha satisfacción enorme. Facía moitos anos que Arteixo non gozaba dunha proba de trial como esta e agardamos que adaptar estas zonas sirva para recuperar o esplendor do Campionato Galego», explica Carlos López Manteiga, presidente do Moto Club Saltamontes.
«Estou moi centrado no Nacional, pero o meu obxectivo é ir gañar todo», di
Alén Damil afronta con optimismo a terceira cita do Campionato Galego que lle leva precisamente a unha das zonas que mellor coñece, o monte de Subico. «É a miña área de adestramento, estou acostumado a esa orografía e en principio a proba preséntase ben, porque o sitio me gusta, coñezo as pedras e se onde patinan», argumenta.
«Aínda que estou moi centrado no Nacional, o meu obxectivo é ir gañar todo, para poder evitar disputar a última do Galego e organizar a tempada no tramo final dun modo máis folgado», explica antes de apuntar: «A calor será un dos problemas, do mesmo xeito que o po. Nos chanzos grandes haberá que ter os cinco sentidos postos para non fallar».
O deportista coruñés estará arroupado polos seus familiares e seguidores en Subico. No Nacional, onde compite a un só chanzo da elite mundial, Alén Damil apunta cara aos oito primeiros postos.
Iniciación e promoción
O piloto coruñés foi a cara visible nunha xornada de iniciación e promoción do trial en Arteixo celebrada na tarde de onte e por medio da que Trialfactory impulsa o emprego de motos eléctricas neste deporte.
Máis de douscentos nenos gozaron dos inchables instalados na praza do concello para a ocasión.