Bonito, cómodo, con espazo para os ocupantes e a carga, áxil, con consumos reducidos e gran autonomía. Así é o BMW X1 diésel, que concentra nos seus 4,50 metros a maioría de virtudes que se lle poden pedir a un coche.
11 mares 2023 . Actualizado ás 23:35 h.O BMW X1 é un SUV de tamaño medio onde cada centímetro está aproveitado e que exteriormente ten unha imaxe moi atractiva, e máis nesta cor laranxa Utah metalizado. A gran grella con riles sobredimensionados protagoniza o seu frontal, e a combinación dos pasos de roda negros, retrovisores e spoilers en prata e a liña dos portelos cromada fan que teña un deseño moderno e dinámico. É unha carrocería musculosa, con grandes pliegues no capó e os laterais e o teito prolongado nun gran alerón sobre a luneta traseira. Para rematar, a nosa unidade de proba montaba unhas espectaculares lamias opcionais de 20 polgadas.
No interior mantense esta mesma idea: combinación de materiais, cores e texturas, incluíndo toda a parte superior do cadro de mandos e as portas forrada en coiro, e un axuste perfecto de todas as pezas, o que se agarda dunha marca premium como é a alemá. A posición de condución é case perfecta, outra dos acenos de BMW, cuns asentos que recollen e suxeitan perfectamente o corpo, acelerador de táboa e unha boa superficie para descansar o pé esquerdo.
Ante o condutor álzanse dúas pantallas de 10,2 e 10,7 polgadas situadas nunha mesma superficie alongada estilo tablet. O cadro de instrumentos ten uns gráficos bonitos, pero talvez demasiado minimalistas á hora de consultar por exemplo o nivel de combustible ou a temperatura do motor. Ademais, se lle dá o sol de plano a visualización vese mermada. A consola central flotante aloxa o botón de aceso, a panca de cambio e o selector de modos de condución. Baixo o cadro de mandos hai unha superficie de carga inalámbrica que permite levar o móbil suxeito e orientado cara a nós mentres se está utilizando.
Os pasaxeiros de atrás teñen bastante espazo para as pernas e uns asentos que se moven sobre raíles. Isto non vai en detrimento do do maleteiro, que cubica 540 litros e conta cun amplo compartimento baixo o piso. En xeral, sorprende a capacidade que ofrece este coche de 4,50 metros xustos.
Este X1 ten un motor diésel de catro cilindros e 2.000 centímetros cúbicos que rende 150 cabalos, así que se podería dicir que é un diésel «de toda a vida» pero co mellor dunha tecnoloxía que evolucionou ao longo de 120 anos de historia: turbo, intercooler, inxección directa por raíl común e admisión variable. Acelera de 0 a 100 en 8,9 segundos, dá o par máximo a partir de 1.500 revolucións, e a caixa de cambios de 7 velocidades é suave e efectiva nas recuperacións.
O coche pesa 1.650 quilos, pouco para as súas dimensións e motor, e sobre todo comparado cos híbridos e eléctricos de hoxe en día. Isto tradúcese nunha axilidade e un comportamento dinámico sobresalientes, que permiten gozar moito da condución a ritmos alegres, aínda que non sexa un deportivo. Inclina nas curvas, pero de forma totalmente nobre, e os apoios e a pisada son simplemente perfectos. A altura da carrocería ao chan é de 20,5 centímetros, así que podemos meter este SUV por camiños rotos con bastante seguridade. No modo de condución Sport temos a opción de desconectar o control de estabilidade.
O consumo medio oficial é de 4,9 litros aos cen, o que nos dá unha autonomía superior aos 900 quilómetros co depósito estándar, de 45 litros, e de nada menos que 1.100 quilómetros se leva o depósito ampliado de 54 litros, como era o noso caso. As emisións son de 129 gramos por quilómetro e conta con depósito de AdBlue.
A nosa unidade de proba incluía un equipamento extra moi abundante, incluíndo acceso sen chave, portón eléctrico, faros de led adaptativos, head up display, cambio automático de luces curtas/longas, teito de cristal panorámico, asentos dianteiros eléctricos e o do condutor con memoria e un equipo de son de alta fidelidade Harman Kardon.
O sistema de condución semiautónoma, con control de velocidade de cruceiro adaptativo e mantemento de carril, funciona de forma moi suave e efectiva, e basta con apoiar lixeiramente sobre o volante para conducir literalmente cos dedos.
O BMW X1 está dispoñible desde 40.900 euros nesta versión diésel, aínda que esta unidade a lume de biqueira de extras vaise ata os 59.000 euros ou 437 euros ao mes se optamos por un renting. Hai outra versión diésel de 163 cabalos, con tracción total, e dúas de gasolina de 136 e 170 cabalos, ademais de dous híbridos enchufables de 245 e 326 cabalos. Por potencia que non quede, aínda que quen opte por este diésel de 150 cabalos non a botará en falta.