Os novos coches á venda a partir de xullo serán máis caros pero máis seguros
ECONOMÍA
Todos os modelos sairán de fábrica con oito sistemas de seguridade obrigatorios
25 abr 2024 . Actualizado ás 09:59 h.A partir do próximo mes de xullo, acabáronse os coches económicos. Os que aínda se consideraban alcanzables —os de tamaño medio ou pequeno, de acabado básico e motor de combustión de entre 70 e 90 CV— serán os que máis van subir de prezo coa entrada en vigor dunha nova fase da normativa europea que obriga a todos os turismos e furgonetas lixeiras que se comercializan na Unión Europea a saír de fábrica con oito sistemas electrónicos de axuda á condución, ADAS (Advanced Driver Assistance Systems), que xa van de serie en todos os modelos de gamas altas e nos de gama media máis equipados.
Esta democratización tecnolóxica está regulada no Regulamento de Seguridade 2019/2144 da Unión Europea, que comezou a aplicarse o 6 de xullo do 2022, para os vehículos de nova homologación. Esta marxe de dous anos que concedeu a UE aos fabricantes para adaptar a produción ás novas regulacións implicará un aumento de prezo que o sector cualifica de «pouco significativo» para a gran maioría dos modelos e «moderado» no caso dos vehículos que actualmente se venden cos sistemas básicos de seguridade —ABS e airbags—.
Fontes da patronal de fabricantes de automóbiles Anfac aseguran que o 85 % dos modelos que se comercializan en España xa incorporan de serie a alerta de cambio de carril involuntario; o 80 %, o sistema de freado de urxencia; e o 62 %, a asistencia de velocidade intelixente, que son algúns dos sete novos sistemas de seguridade obrigatorios.
«Imos vender máis seguridade, que é algo do que a inmensa maioría dos condutores non quere prescindir, e se vén xa de serie e é obrigatorio, non podemos falar de incrementos elevados», aseguran fontes da rede comercial galega, que estiman que estes aumentos oscilarán entre os 100 e os 400 euros. «Non deberían de superar estas cifras», aseguran.
De todos os xeitos, os concesionarios albergan esperanzas de que, tras ese pequeno repunte, o prezo dos coches do trinque decaia ao longo do 2024.
Coches máis autónomos
Cabe lembrar que o custo medio dun vehículo novo en España, impostos incluídos, pasou dos 21.829 euros no 2022 aos 23.666 euros no 2023, segundo os datos facilitados pola Axencia Tributaria. Este incremento do 8,17 % confirma unha tendencia á alza que persiste desde fai xa catro anos, —por mor da crise dos microchips e da redución de coches en stock —, e agravada pola escalada inflacionista. En todo caso, esta será unha subida de prezos para salvar vidas, xa que o cálculo de Bruxelas é que os sistemas ADAS evitarán máis de 25.000 vítimas mortais de aquí ao 2038. O novo equipamento de seguridade obrigatorio a partir de xullo consistirá nun detector de fatiga e somnolencia (DDR), que avisa ao condutor cando detecta que perde a concentración ao volante, xa sexa por soño, fatiga ou outras causas; o Asistente de velocidade intelixente (ISA), que se encarga de respectar en todo momento os límites de velocidade da vía; a alerta de tráfico cruzado (RCTA), sistema que supervisa o tráfico traseiro en sentido transversal ao saír marcha atrás; alerta de cambio involuntario de carril (LDW) que avisa ao condutor cando se sae da traxectoria involuntariamente, sen utilizar o intermitente; o sistema de freado de urxencia (ESS) que detecta o momento exacto no que o coche que circula por diante fai unha freada de urxencia; o inhibidor de arranque con alcoholímetro; a alerta de uso do cinto en todas as prazas e unha caixa negra, dispositivo parecido ao dos avións, aparafusado ao chasis.