Mercedes ao fin comercializa coches capaces de conducir de forma totalmente autónoma
SOCIEDADE
O fabricante alemán será o primeiro que ofreza esta posibilidade a calquera cliente. A súa tecnoloxía, denominada Drive Pilot, é superior á de Tesla, que require supervisión por parte de quen conduce. Xa está dispoñible en varias estradas de EE.UU.
24 abr 2024 . Actualizado á 18:27 h.Son moitos os fabricantes que, dunha forma ou outra, ofrecen axudas á condución, máis ou menos avanzadas, que permiten que un coche conduza de forma semiautónoma. Manteñen ao coche no carril, son capaces de frear se detectan un obstáculo, avisan ao condutor de que se está quedando durmido ou executan manobras á hora de aparcar. En calquera caso, nunca ata o de agora en ningún país era legal nin se ofrecía a tecnoloxía que permitía desatender por completo o volante dun coche producido en serie. É certo que Tesla, marca pioneira co seu sistema Autopilot, xa ofrece unha experiencia próxima á condución autónoma, pero que segue requirindo a supervisión humana. De feito tráxicos accidentes viñeron confirmar de forma dramática esta necesidade, que a marca americana confirma na súa páxina web de soporte: «É un sistema de asistencia ao condutor avanzado que mellora a seguridade e a comodidade ao volante (...) están pensados para o seu uso cun condutor totalmente atento, que teña as mans no volante e estea preparado para tomar o control en calquera momento».
Tamén quen lea esta noticia talvez vise nas redes sociais vídeos de coches, en servizo de taxi ou enviando paquetería, que non necesitan condutor. E é certo que en EE.UU os robotaxis Waymo de Alphabet (compañía pertencente a Google) e Cruise de General Motors integran complexos sistemas de condución asistida que o fan posible. Pero tal e como lembra o medio Fortune nun recente artigo, ningunha destas empresas vende estes vehículos ao consumidor final.
Ademais tampouco estiveron exentas de sufrir accidentes que levaron en momentos puntuais a suspender a prestación dos seus servizos. Na internet hai imaxes que demostran que é posible con certa facilidade enganar ao sistema de intelixencia artificial destes coches, dotados con radares, GPS e cámaras mostrando como se deteñen ante alguén que porta unha camiseta cun sinal de STOP estampada.
Foi o fabricante alemán Mercedes-Benz o primeiro en comercializar nos seus concesionarios un coche que calquera pode comprar e que permite converterse por fin nunha especie de Michael Knight ao volante dun coche fantástico como o daquela mítica serie dos 80 protagonizada por David Hasselhoff e aquel icónico Pontiac tuneado chamado KITT. Tomarse un café a bordo, ler o xornal ou ver a túa serie favorita sen temor a ser multado ou ter un accidente (teoricamente) é ao fin posible. Mercedes conseguiuno ao ser a primeira marca que consegue o nivel 3 de condución autónoma nos Estados Unidos grazas á súa tecnoloxía Drive Pilot. Tesla e ningunhas outras empresas só chegaran ata o de agora ao nivel 2. Mentres que o nivel 4, o máis avanzado, só o conquistaron os servizos de taxi robotizados anteriormente mencionados.
Dispoñible en dous modelos mediante subscrición
En todo caso, este sistema Drive Pilot necesita cumprir unha serie de requisitos para que poidamos viaxar esquecéndonos por completo de conducir. Por agora está dispoñible unicamente para coches adquiridos nos estados de California e Nevada, onde Mercedes conseguía o ano pasado a certificación. E dentro destes territorios, é apto para unhas vías específicas, testadas previamente polo fabricante e sempre que o coche non pase os 65 quilómetros por hora. Estrear este avance tecnolóxico tampouco é barato. Equípano os sedáns máis caros da marca alemá. O modelo S, con motores de combustión e híbridos e a súa variante eléctrica, o EQS. No mercado español ambos parten novos en máis de 100.000 euros. A condución autónoma, ademais, págase aparte mediante un modelo de subscrición que custa 2.500 dólares ao ano. O sistema equipa un sensor na parte dianteira do coche, radar óptico, cámara con visión de 360º e outra a maiores integrada no parabrisas traseiro. Todo iso diferencia a estas unidades do resto, ademais dunhas luces cor turquesa que se acenden cando está operativo para informar o resto de usuarios da vía e ás autoridades.
Markus Schäfer, director tecnolóxico da firma, pretende seguir avanzando e espera que nunha década Mercedes-Benz conte con vehículos xa certificados co nivel 4. Outro fabricante europeo, Polestar, división de coches eléctricos da sueca Volvo e integrada á súa vez no xigante chinés Geely, segue o ronsel dos alemáns. Grazas á súa colaboración coa empresa israelí Mobileye poderían ser os seguintes en poñer nos seus concesionarios vehículos así.