A mellor hora do día é entre as dez e as once da mañá, cando hai un 42 % menos de persoas que a media do resto da xornada
25 may 2017 . Actualizado ás 05:00 h.Mércores, ás dez da mañá ou ás catro da tarde; a poder ser a final de mes. Ese é o mellor momento para facer a compra. Pola contra, os venres, de sete da tarde a nove da noite, e os sábados, de doce do mediodía a dous da tarde, as colas nos supermercados vólvense eternas. Así o mostra un estudo da app de descontos Gelt, que procesou 50.000 billetes de compra procedentes de 30 cadeas de supermercados de toda España.
Segundo este estudo, a mellor hora do día para facer a compra é entre as dez e as once da mañá, cando hai un 42 % menos de persoas que a media do resto da xornada. Pola tarde, a franxa máis tranquila é entre as catro e as seis, cun 30 % menos de afluencia. Sería conveniente, doutra banda, evitar o intre entre as sete e as nove da tarde, porque as colas ante as caixas increméntanse ata un 49 %.
Outra opción para evitar as aglomeracións é facer a compra entrada a noite. Os establecementos abertos en horario de once da noite a nove da mañá xeran o 1 % do consumo, que xa é máis do que venden as cadeas por Internet, por exemplo.
Pero non depende só da hora: hai que ter en conta o día da semana. Os venres e os sábados concéntranse o 42 % das visitas ao súper. Durante estes días os españois gastan a metade do seu orzamento de supermercado. A menor afluencia, doutra banda, dáse os mércores e xoves, con entre un 30 e un 37 % menos de transaccións.