Santiago Rey Sande, fundador da panadería A Nova, morreu aos 88 anos
07 feb 2024 . Actualizado ás 05:00 h.Foise como pedía, na súa casa e rodeado de toda a familia, unha xornada moi sinalada para el e a súa parroquia, o día de San Blas. Santiago Rey Sande, Chacho, nacido en Oseiro en decembro de 1935 no seo dunha familia dedicada en corpo e alma á panadería.
As súas dúas paixóns, o fútbol e posteriormente a caza, tíñaas que compaxinar coa súa dura profesión de panadeiro.
Pronto comezou no fútbol, como porteiro, destacando en diversos equipos da provincia como o Cidade Xardín, Brigantium ou Ordes, chegando a xogar no Fabril dúas tempadas (1959-1960 e 1960-1961).
Amigo desde a infancia de Arsenio Iglesias , ambos gozaban das pachangas de verán na praia de Barrañán. Era o socio 1.346 do noso Real Club Deportivo da Coruña.
Pero tamén hai que falar da caza, porque Chacho conseguiu nos anos oitenta, contra todo prognóstico, reunir aos cazadores de todas as parroquias do municipio de Arteixo para organizarse e crear o coto privado de caza Apóstolo Santiago, estreándose el como fundador e presidente.
Como panadeiro, Chacho comezou a traballar co seu pai e os seus irmáns na panadería Rey , de Oseiro, cando se deu conta de que o fútbol non lle daba para vivir.
casou con Victoria Pérez Rumbo, pertencente á familia Lamelas, e xuntos abriron en 1965 a súa propia panadería de nome A Nova, no Seixedo, dacabalo entre Oseiro e Vilarrodís, como dicía el «cando na estrada nova había apenas catro casas». Alí estableceuse un centro de reunión de cazadores, seareiros e veciños ata a súa xubilación, tal era o carisma deste home tan especial.
Chacho e a súa familia son os encargados de fabricar as populares roscas de San Blas de Oseiro. Son unhas roscas que despois se decoraban e adornaban para a misa do día de San Blas e, dous días despois, cortábanse en tantos anacos como casas había na parroquia, repartíndose posteriormente.
E foi xusto o 3 de febreiro, en San Blas, cando Chacho marchouse para sempre deixando aquí á súa muller Victoria , aos seus fillos Santiago, Alberto e Jesús, e aos seus netos, Cristina e Alejandro, con «un gran desgusto», pero orgullosos de ser «a muller, os fillos e os netos de Chacho».
Jesús Rey Pérez é fillo de Santiago Rey Sande.