O 10 do equipo de Luis César volveuse titular indiscutible desde o pasado verán
18 ene 2017 . Actualizado ás 20:44 h.O centrocampista Antonio Campillo ampliou o seu contrato co Lugo ata o 30 de xuño do 2019, segundo informou o club galego nun comunicado. As dúas partes referendaron o seu vínculo por dúas tempadas máis nun contrato que asinaron o xogador e o presidente do Lugo, Tino Saqués, este mércores no Anxo Carro.
Campillo foi incorporado polo conxunto galego en xullo do 2015, días despois da chegada de Saqués á presidencia. O futbolista asinou inicialmente por dúas tempadas con opción a continuar no equipo un curso máis, ata o 2018, pero co acordo que rubricou agora, o seu contrato amplíase ata o 2019.
O xogador madrileño chegou ao Lugo procedente do filial do Raio Vallecano, co que xogara en Segunda División B. Ademais, adestrouse de forma habitual ás ordes de Paco Jémez no primeiro equipo do conxunto franjirrojo e, con anterioridade, vestira as camisetas do Atlético de Madrid e o Xetafe, entre outros clubs.
Desde a chegada de Luis César Sampedro ao banco esta tempada, Campillo foi un fixo nas aliñacións do Lugo. O dorsal 10 do conxunto galego disputou 20 partidos dos 21 que se xogaron e formou parte do once inicial en 19 deles (1.632 minutos). Nesas citas, Campillo anotou tres goles, deu dúas asistencias e disparou 24 veces a porta.