Morre en Sober o empresario Lino Fernández, a un mes de cumprir 92 anos
11 abr 2017 . Actualizado ás 17:01 h.Esta tarde será enterrado en Sober o empresario Lino Fernández Vidal, falecido onte a un mes de cumprir os 92 anos de idade. Foi o máximo responsable da empresa local Factorías Fernández, fundada polo seu pai, Manuel Fernández, en 1915. O Concello de Sober fixo públicas onte as súas condolencias pola morte de quen o alcalde, Luis Fernández Guitián, cualifica como un «empresario exemplar».
Dedicada á fabricación de ferramentas para o traballo no campo, -e sobre todo na viticultura e a elaboración de licor, dúas actividades de gran tradición en Sober-, Factorías Fernández foi durante moito tempo a principal empresa de Sober e chegou a exportar os seus produtos a unha ducia de países e a ter en persoal a corenta traballadores. Lino Fernández dirixiuna durante decenios, ata que cumpriu 80 anos e decidiu retirarse e ceder a testemuña á súa familia.
En todas as casas
Nos seus primeiros tempos, a empresa utilizaba o cobre como materia prima básica, pero co tempo acabou introducindo o plástico. Lino Fernández foi o artífice dos cambios radicais que a empresa experimentou a partir dos anos 60, cando empezou a producir en cadea. Naquela época, o agora falecido asistiu ás máis importantes feiras de maquinaria do mundo. Os portavoces do Concello destacan que as súas marcas A Flor, Lijoya, Follanova ou Sober están presentes «na práctica totalidade dúas fogares galegos que se dediquen á viticultura».
Lino Fernández tivo ademais un papel activo na posta en marcha da Feira do Viño de Amandi. Formou parte do grupo que organizou a primeira edición en 1981 xunto con Benito Rivas Valdés, Eduardo Álvarez Pérez, Jesús Vaqueiro Gardo, Arturo Corral Rivas e Luis Fernández Guitián, o actual rexedor municipal.
Os seus restos mortais son velados no Tanatorio Rivas. O funeral celebrarase ás seis da tarde de hoxe na igrexa parroquial de Proendos.