«Se chove, deixa chover», cantaban Treixadura. E esa é a actitude. En Galicia estamos acostumados convivir coa choiva, así que o que sobran son plans B para unhas vacacións pasadas por auga, como se prevé que sexan estas. A final de contas, xa o dicía Sinistro Total, en Galicia «a choiva é arte»
28 mares 2024 . Actualizado ás 13:16 h.
MUSEOS NA Coruña
Dos moitos museos da Coruña, dous sobresaen polo seu afán por divulgar a ciencia dun modo ameno e interactivo. Un deles é a Casa das Ciencias (na foto), con tres plantas dedicadas a exposicións e experiencias e un planetario na súa cúpula. O outro é a Domus ou Casa do Home, un museo participativo dedicado de forma global ao ser humano.
FAENAR CON MARISCADORAS
Dá igual que chova ou que ventee. As mariscadoras baixan ao mar cada mañá co seu sacho ou co seu raño para prover ás lonxas, principalmente de bivalvos. É un traballo duro que podes coñecer en profundidade e de primeira man saíndo a faenar con elas. Hai varias empresas e asociacións que ofrecen a posibilidade de realizar visitas guiadas e activas, como AmarCarril (amarcarril.wordpress.com), a asociación de Mulleres do Mar de Cambados (guimatur.org) ou Piragüilla, na Illa de Arousa (piraguilla.com).
CATAS EN ADEGAS
As cinco denominacións de orixe galegas contan con rutas do viño que posibilitan coñecer moitas das adegas da nosa comunidade. Nalgunhas delas, ademais da tradicional visita guiada, ofrécense experiencias enológicas, catas e actividades de contido divulgativo. É o caso, por exemplo, de Martín Códax (na foto), elixida Mellor proxecto de enoturismo nos Premios Verema 2022.
BALNEARIOS
Galicia é unha potencia termal, cunha vintena de balnearios repartidos polas catro provincias. Non é mal plan, sen dúbida, aproveitar estes días para relaxarse cun tratamento mineromedicinal ou simplemente gozar do reconfortante abrigo dos clubs termais. Unha experiencia singular é darse un baño baixo a choiva nalgunha das moitas termas naturais ao aire libre que podes atopar na nosa xeografía.
O ENCANTO DA PEDRA EN SANTIAGO
Seguramente son os días de choiva os ideais para coñecer Santiago na súa verdadeira esencia. A cidade transmuta baixo a choiva. Tornan as súas cores e a pedra mollada outórgalle unha dimensión especial. Pasear polas súas rúas porticadas ou contemplar a praza do Obradoiro e a fachada da Catedral empapadas son experiencias que non se esquecen.
CASA MUSEO
Se algo non falta en Galicia é talento literario. Moitas das casas natais dos nosos máis insignes escritores foron reconvertidas en museos. Como as de Rosalía de Castro (en Padrón), a de Valle-Inclán (Vilanova de Arousa), Manuel María (Outeiro de Rei), Emilia Pardo Bazán (A Coruña), Camilo José Cela (Iria Flavia) ou Uxío Novoneyra (Parada, O Courel), entre outras. Visitalas axuda a coñecer e entender doutro xeito a súa vida e a súa obra.
DE PETISCOS POR LUGO
Aseguran os aldeáns e os bos coñecedores das moitas bondades da cidade amurallada que, a pouco que che descoides, se sales de viños ou de canas pola zona vella de Lugo é posible que che despidas da comida ou da cea. E é que a oferta de petiscos que se che ofrece con cada consumición é en grao sumo xenerosa. E, sen dúbida, bares e tabernas non che van a faltar.
ACUARIOS
A visita a un acuario é sempre un plan infalible. No caso dos galegos, ao estar estreitamente vinculados co noso medio mariño, é ademais un excelente xeito para descubrir esa parte de Galicia menos coñecida. A Coruña conta co máis grande da comunidade, a Casa dos Peixes (na foto), moi preto da torre de Hércules. Tamén O Grove conta cun acuario, situado en Punta Moreiras.