Absolven a unha empresa de facer trampas e falsear os metadatos do seu plan de riscos laborais tras un accidente mortal
VIGO CIDADE
A viúva do traballador falecido acusou á firma de falsear a data dun documento de prevención para póla antes do accidente e eximirse así de culpa nun xuízo pola indemnización
13 dic 2023 . Actualizado ás 05:00 h.A Quinta Sección da Audiencia de Pontevedra, con sede en Vigo, confirmou a absolución a unha empresa de transportes de mercancías de Tui dunha falsificación de documentos relacionados coa prevención de riscos laborais para presentalo nun xuízo por unha reclamación de indemnización pola morte accidental dun traballador o 15 de outubro do 2020. A viúva denunciou que había unha data dos metadatos (pegada ou rastro que deixa un arquivo tras a súa creación) posterior ao accidente, e sospeitou que a elaboraron ad hoc (a propósito) e o contido do informe do accidente foi alterado e modificado.
A viúva do empregado acusaba á empresa de ter elaborado a documentación nunha data posterior ao accidente. Unha proba pericial intentou probar que estableceran a data de creación dos arquivos informáticos achados no computador incautado e usado polo técnico de prevención que asinaba loa papeis. A viúva dicía que eran de data posterior ao falecemento pero o Xulgado de Instrución número 6 de Vigo concluíu que non había indicios suficientes do delito nin se pescudaron os metadatos do arquivo orixinal. A demandante pedía que se acudise á nube ou programa informático do servidor central para pescudar a data do documento primigenio.
A Audiencia, nunha sentenza do 12 de xullo do 2023, replica que no computador había documentos en formato Word antigos que logo foron convertidos en PDF, o que demostra que xa existían antes, e confirma a absolución da transportista e da empresa de prevención laboral por falta de probas.