«Balea», unha obra visual desplegable, é o primeiro libro conxunto dos ilustradores
17 dic 2015 . Actualizado ás 12:00 h.Hai libros para ler e hai libros para ver. O que crearon xuntos os ilustradores vigueses Federico Fernández e Germán González pertence claramente á segunda categoría. Balea, editado por Kalandraka, é unha obra especial tanto polo seu formato como polo seu contido. En estado de repouso mide 14 centímetros de ancho por 33,5 de alto, pero se se estira como un acordeón, acada unha anchura dun metro e 40 centímetros e ademais pódese colgar na parede, coma se fose un cadro.
«É unha obra completamente visual, un proxecto diferente na liña dos traballos máis pictóricos que facía eu hai anos», conta Federico. Para levalo a cabo lio ao seu amigo Germán, aínda que non tivo que insistirlle moito. «Facía tempo que tiñamos ganas de facer algo xuntos. Cando che piden unha ilustración sempre tes que adaptarche a un texto e, neste caso, non era necesario», explica. «A idea de Balea é miña e ese mundo das máquinas e os artefactos tamén, pero encaixaba moi ben coa súa liña de traballo, xa que el ten unha obra pictórica moi interesante, con obxectos pequeniños en acuarela a escala 1:1».
Polo lado que mostran na foto apréciase a estrutura exterior do cetáceo mecánico. O anverso está cheo de minúsculos compartimentos habitados por seres ataviados con traxes amarelos ocupados nas súas cousas. Os dous autores presentan o libro mañá en Vigo. Ás 18.30 horas en Libros para Soñar (Triunfo, 1), aparecerán vestidos como os personaxes do libro, cun show especial. «É un libro diferente e hai que facer unha posta en escena diferente, Non podes ler un contacontos», razoan.
A relación entre ambos os artistas remóntase ao comezo do milenio. Aínda que os dous estudaron Belas Artes na Universidade de Vigo, son de distintas promocións. Coñecéronse despois, chegaron a compartir vivenda unha tempada e no 2011 anos participaron na posta en marcha do Falcón Milenario, un piso da rúa Cervantes tuneado como salga de arte, no que seguen desenvolvendo plans creativos. «Tamén fixemos algunhas exposicións conxuntas, pero é o noso primeiro libro compartido», indica Germán.
O proxecto Balea desenvolveuse por separado. Primeiro, Federico armou o debuxo na súa casa. «Nun primeiro momento pensei en facer unha máquina. A balea xurdiu de xeito casual». Unha vez acabado, Germán, que tamén suxeriu o formato póster desplegable, fixo a súa achega pictórica. Federico teno moi claro: «Se o houbese coloreado eu, xa non sería esta Balea. Sería outro libro. A cor pode cambiar por completo unha obra», asegura o artista que, segundo indica, acostuma empregar o gouache e cores planas. «En cambio, el dálle profundidade e un aspecto de libro clásico, traballado coa acuarela», explica sobre a tarefa do seu compañeiro.
Balea non leva máis palabras que una coas cinco letras do título. Pero é unha historia infinita que se le a través do debuxo. «Trátase do que o que faga esa lectura visual imaxine situacións que ocorren aí dentro e que poidas perderche en elas», indica. Tampouco se sabe de onde veñen estes seres. «Ao principio pensamos pór pistas para buscar personaxes, pero dándolle voltas démonos conta de que non facía falta. Decidimos que sobraba».
A pesar da orixinalidade da idea, non tiveron problemas en «venderlla» a unha editorial porque antes se presentaron con el ao Premio Nacional de Ilustración Compostela. «Non gañamos, pero fomos finalistas e ata aí só chegan os proxectos con visos de ser publicables», conta. Este o foi e non saben se terá continuidade. «Hai que agardar a ver como funciona», manifestan.
Talvez ocorra como co Falcón Milenario, que empezou como unha proposta para unha soa exposición e continúa con numerosas propostas culturais e artísticas. Para este mes teñen un taller infantil de tres días. Para febreiro preparan algo especial para celebrar o quinto aniversario do espazo e tamén proxectan facer alí unha mostra sobre o proceso de creación de Balea, cos bosquexos e todo o que hai detrás dun traballo tan peculiar.