Moito máis que ir á escola; con catro anos, Jose utiliza o plan Madruga, o taxi, o comedor e a aula de lecer
MOAÑA
Os seus pais atopan no CRA de Ribadumia todos os servizos para conciliar e dar ao seu pequeno un ensino de calidade. Cústalles 155 euros ao mes
11 feb 2024 . Actualizado ás 05:00 h.Santi Alonso foi un neno do rural, acudiu ao colexio nunha parroquia de Moaña e está convencido que aquilo foi moi positivo na súa formación. «Cando chegamos á ESO estabamos moi ben preparados», conta. Hoxe é el quen confía a educación dos seus fillos á escola rural. Fíxoo co maior, Brais de sete anos, e faino agora con Jose, de catro, que acode cada día á aula situada en Sisán.
Alí ofrécenlle moito máis que un lugar onde aprender as letras e os números. O Centro Rural Agrupado de Ribadumia conta con numerosos servizos que o converten nunha opción moi atractiva para as familias, e Jose utilízaos todos. Empeza a xornada ás 8.15 horas no plan Madruga que se dispensa no ximnasio de Barrantes, media hora despois recólleo a taxista Silvia para levalo a clase xunto aos seus cinco compañeiros e tras a mañá na aula, ás 14 horas volve subirse ao taxi para acudir ao comedor escolar que está en Barrantes.
Talvez el non saiba que lle agarda no prato, pero os seus pais si porque a empresa de cáterin facilítalles cada primeiro de mes información sobre o menú de cada día, unha proposta na que nunca fallan o peixe e os legumes un par de veces por semana.
A xornada de Jose non se acaba coa sobremesa. Ás catro entra na Escola de Lecer que oferta o Concello para que os nenos poidan pasar a tarde xogando ao coidado dun monitor á espera de que os seus familiares poidan ir recollelos.
Jose está apuntado a todos os servizos do CRA e isto cústalle aos seus pais 155 euros mensuais: 20 euros polo plan Madruga, 30 euros pola Escola de Lecer, unha media de 25 euros ao mes polo taxi (varía en función dos días lectivos) e 80 euros polo comedor. Estas tarifas son posibles grazas ás axudas públicas, cuxa achega económica permite aplicar bonificacións que se agradecen especialmente cando son varios irmáns, e, aínda que sempre se poderían abaratar, Santi Alonso opina que son «axustadas» tendo en conta a calidade do servizo que se dispensa. «Nós non temos queixa», sinala. Para el, que é ademais presidente da asociación de pais de alumnos do CRA, na escola rural todas son vantaxes. As cocientes de alumnos reducidas permiten ofrecer unha educación máis personalizada e atendendo ás necesidades de cada alumno, argumenta, e o feito de que os nenos compartan aula, comedor e xogos con rapaces doutras idades «fai que espabilen moito».