O Deportivo busca ante As Palmas a súa sexta vitoria consecutiva ante un estadio de Riazor que esgotou todo o papel dispoñible e que volverá encomendarse ao gran momento de Sabin Merino
01 feb 2020 . Actualizado ás 16:33 h.Coas vimbias cos que contaba ata agora, o once de Fernando Vázquez empezaba a poder recitarse de corrido. Está claro o porteiro; a defensa, salvo polas modificacións que obrigan as lesións, tamén; o centro do campo, con Gaku rehabilitado como cerebro do fútbol coruñés, o mesmo. E a partir de aí empezan as dúbidas. Çolak, Aketxe, Beauvue, Koné, Mollejo, Vallejo... A alternativas, ás que se sumará o exmalaguista Keko, recentemente incorporado, engadiron un abano de cor ao adestrador, que se pensa moito as últimas pinceladas do seu ataque. «Empezo a ter xogadores que creo que deberían ser titulares e para os que teño que buscar un sistema onde caiban todos sen perder eficacia defensiva», dicía onte Vázquez. Sete nomees para só dous postos, polo menos mentres se manteña a zaga de cinco. Só a punta ten dono. Como negarlle a Sabin Merino, inmerso na mellor serie goleadora da súa carreira deportiva, a súa condición de titular.
O atacante, froito de Lezama, marcou ante o Real Madrid no Bernabéu o seu único gol na Liga 2016-2017. Foi o último antes dunha seca de tres anos e tres meses sen ver portería que rompeu no seu debut ante o Racing de Santander. E volveu marcar ante o Cádiz. E ante o Albacete. Nove puntos despois, con Merino véncese. E el convence.
O casting para acompañalo está aberto en Abegondo. «Se me vedes adestrar, veredes que evidentemente estou adestrando outro tipo se situacións», apuntaba o de Castrofeito. Así foi na súa última sesión, na que probou un centro do campo con Peru, Vicente e Gaku Shibasaki, con Çolak e Beauvue nos tres cuartos de campo e —sempre— Sabin de dianteiro centro. Vázquez está metido de cheo no laboratorio para facer unha doce transición na retagarda, de tres centrais a unha parella solvente. «Cando me veredes cambiar? Cando considere que o noso potencial é suficiente como para bater aos rivais utilizando nosas propias armas. De momento estamos noutra fase», explicaba tras confesar que os seus plans pasan por avultar menos en defensa e ofrecer máis asociación na creación. As súas palabras parecen deixar claro que a fase experimental non empezará ante a Unión Deportiva As Palmas. O cambio de cromos das últimas horas tamén fai apostar por unha aposta máis conservadora, máis estable e que ademais se está demostrando fiable.
Todo apunta á continuidade e o Deportivo, como moito, retocará o visto en Albacete. Luis Ruiz podería asaltar o lateral esquerdo para devolver a esa posición a un especialista. Máis tendo en conta que a dupla formada polo canteirán do Atlético e Emre Çolak sufriu por ese costado ante os manchegos, algo evidente a pesar da choiva de eloxios que Mollejo recibiu tras o partido do Belmonte. Onte, Fernando volveu botarlle un capote. «Fáltalle comprender un pouco a función dese tipo de xogador en especial, se quixese xogar así non tería ningún problema», deixou caer.
Vellos coñecidos
O fútbol é moi pequeno e todo queda en casa. O Lugo, «inimigo» na táboa, adestrou onte en Abegondo por cuestións loxísticas antes de emprender rumbo a Almendralejo. Mentres os lucenses se marchaban ao vestiario, os xogadores do Deportivo, pola banda oposta, saltaban ao céspede. Con eles Fernando Vázquez, exentrenador do Lugo e tamén do As Palmas. Das illas só garda bos recordos. «Estiven un ano e foi impresionante. Pasei un ano alí incrible. A falta de oito xornadas faltábannos dous puntos ou así para salvarnos e descendemos. Foi moi duro, pero quero tanto a esa afección...», se sinceraba Fernando Vázquez tirando de recordos daquela campaña 2001-2002. Naquel persoal había xogadores como Paqui, Schürrer, Jorge Larena, Samways. E por suposto Rubén Castro.
Á fronte do rival, outro ex da casa: Pepe Mel, que xa vén chorado da illa. Con razón. Once xogadores, un equipo completo, quedaron en Canarias por unha ou outra razón. O canteirán Fabio González, que acaba de estampar o seu contrato como xogador do primeiro equipo, foi o último en caer, vítima dun virus estomacal. «O xogador merece ter esa ficha. O malo para nós é que, por desgraza, o dorsal vaino lucir na cama da súa casa», dixo Mel na previa. Caeu tamén Álex Suárez por un problema de cadeira. A eles súmanse Mantovani, Aridai, Drolé, Ávaro Lemos, Cedrés, Dani Castellano e Raúl Fernández. Tampouco están Benito e Javi Castellano , que cumpren ciclo de amoestacións. Con semellante nómina de desgrazas, o adestrador madrileño contará en Riazor con trece futbolistas profesionais. A punto estivo Narváez de deixar o número nunha ducia, pero finalmente entrou. Aythami, autor do tanto do triunfo visitante a campaña pasada, é outro vello coñecido que volverá pisar o céspede de Riazor. Todo queda en casa.
Ambiente de grandes citas
Por terceiro partido consecutivo, Riazor colgará o cartel de non hai billetes. As entradas á venda dispoñibles esgotáronse onte. Terá Vázquez o ambiente que desexaba, ese que segundo el fai grandes aos equipos. Unha mensaxe no que volveu insistir. Con premio.
Aliñacións probables:
Deportivo: Dani Giménez; Bóveda, Mujaid, Somma, Montero, Luis Ruiz ou Mollejo; Peru, Gaku, Aketxe, Çolak e Sabin Merino.
As Palmas: Vallés; Curbelo, Lemos, Aythami, Da Bela; Kirian, Ruiz de Galarreta; Srnic, Tana, Pedri; Rubén Castro