Á pesca pode custarlle catro veces menos intentar protexer aos golfiños

Para reducir a mortaldade de golfiños, xa hai anos que os pesqueiros están obrigados a equipar os seus aparellos con disuasores acústicos, coñecidos como pingers. As autoridades comunitarias e nacionais impoñen estes aparellos porque os sons que emiten poden afastar aos cetáceos dos aparellos e, xa que logo, evitar que queden atrapados cando intentan comerse as capturas dos pescadores ou compiten con eles polo peixe. Procurar protexer aos mamíferos mariños da pesca accidental cústalle diñeiro á flota, pero o gasto pode reducirse considerablemente, case catro veces, se España permite empregar un modelo cuxa eficacia han validado o Ifremer (Instituto Francés de Investigación para a Exploración do Mar) e o centro tecnolóxico vasco AZTI.

A flota francesa de artes de enmalle, como o volante, xa emprega o modelo DDD03L, da empresa italiana STM. A efectividade doutros dispositivos dese mesmo fabricante, tamén do modelo DDD3, foi demostrada en arrastreiros vascos por AZTI. Da autorización para utilizalos en Francia , que se remonta ao 2014, e das probas na flota española deixa constancia a Organización de Produtores Pesqueiros Porto de Celeiro nunha comunicación ao Ministerio de Agricultura, Pesca e Alimentación.

Acreditado polos científicos o funcionamento deses dispositivos, desde esa entidade pesqueira da Mariña propoñen ao ministerio que equipare á flota de enmalle española coa francesa. Depende de que a Secretaría Xeral de Pesca aprobe os disuasores, co cal contribuiría a «reducir significativamente custos» na flota. «Unha necesidade e unha oportunidade», recalcan desde Porto de Celeiro, porque significaría un «importante aforro económico en reposición e mantemento». 

De 3.936 euros a 999

Máis barato e con mellores resultados? Individualmente non, porque cada un dos disuasores acústicos que montan agora os pesqueiros españois custa 82 euros, e cada un dos que propón a citada organización de pescadores sae en 333 euros. Globalmente si sae a conta, segundo as cifras achegadas por armadores celeirenses. Por exemplo, para cumprir as esixencias normativas nun aparello de case 10 quilómetros de longo, fan falta 48 pingers dos actuais, 3.936 euros. Co modelo DDD abondan tres para cubrir esa mesma rede e, xa que logo, o investimento redúcese a 999 euros, case a cuarta parte.

De momento non transcendeu resposta do ministerio. Do departamento que preside Luis Planas depende autorizar, ou non, un modelo de ahuyentador acústico que non se axusta explicitamente ao regulamento da Comisión Europea que os define.

---

---

---