EAPO e EFFOP chaman a a Comisión a intervir porque consideran que o Reino Unido «parece violar» o acordo coa UE
04 feb 2024 . Actualizado ás 04:55 h.De nome científico Ammodytes spp, o lanzón é un peixe que en Galicia se coñece como birlo, bogón, pión ou furón. De corpo alongado e cilíndrico, con tonalidade verdosa, abundan na beira do mar e son un alimento de peces máis grandes. Adoita capturarse en Galicia con boliche ou chinchorro, unha rede de cerco, e acostuman comerse sobre todo fritos, pero as vendas nas lonxas da comunidade autónoma derrubáronse a partir do 2019. Segundo a plataforma oficial PescadeGalicia, ese ano poxáronse 16.000 quilos, unha ínfima cantidade comparada cos case 235.000 do 2006, pero moitos máis que os 279 quilos do 2022 ou os 1.210 do 2023. Alcanzable, en lonxa o ano pasado cotizou a 1,59 euros o quilo, pero durante o recentemente acabado mes de xaneiro a media subiu a 3,18, aínda que só se comercializaron 182 quilos.
Para outros pescadores da Unión Europea (UE) o lanzón importa moitísimo máis. Directamente, os máis de 52 millóns de euros que se facturaron no 2022 polas ao redor de 257.000 toneladas capturadas por barcos comunitarios en augas do norte do Reino Unido e de Escocia . Dous datos da Mariner Management Organization que a Asociación Europea de Organizacións de Produtores de Peixe (EAPO, polas súas siglas en inglés) e a Asociación de Produtores Europeos de Fariña e Aceite de Peixe (EFFOP) lémbranlle á Comisión Europea e, en concreto, a Virginijus Sinkevicius, comisario de Medio Ambiente, Océanos e Pesca.
Apelan a Bruxelas porque case o 97 % das cotas de lanzón deste ano son da UE, aténdose ao pactado co Goberno de Londres . Con todo, de modo «unilateral, sen consulta ou acordo previo», o Reino Unido anunciou a súa intención de «pechar a pesca de lanzón no Mar do Norte inglés e en augas escocesas» a partir de abril.
Esben Sverdrup-Jensen, presidente de EAPO, e Odd Eliasen, presidente de EFFOP, advirten a Sinkevicius de que esa medida, desde unha perspectiva xurídica, interprétana esas dúas organizacións «como unha violación» do Acordo de Comercio e Cooperación entre a UE e o Reino Unido. Dito doutro modo, entenden que a veda do lanzón «altera o espírito de cooperación previsto no acordo e expón preocupacións sobre os precedentes para a futura xestión pesqueira e a asignación compartida de recursos».
Certificada como pesqueira sostible desde o 2017 por MSC (Marine Steward Ship Council), a do lanzón «é unha especie vital para os produtores e procesadores da UE», subliñan EAPO e EFFOP. Seguindo as recomendacións científicas do Consello Internacional para a Exploración do Mar (ICES, polas súas siglas en inglés), destacan que as posibilidades de pesca «fixáronse de acordo cun enfoque baseado no ecosistema». A maiores, inciden en que cando os barcos van por lanzón «son mínimas» as capturas accidentais de especies en perigo, ameazadas ou protexidas.
Xa que logo, estas dúas organizacións pesqueiras comunitarias apelan a Sinkevicius, pedíndolle unha reunión «para discutir máis a fondo» o que na súa opinión está claro: «Pódese atopar un equilibrio entre a protección do medio mariño, incluídas as aves mariñas, e o mantemento de actividades pesqueiras sostibles».
E aínda que o Reino Unido teña abandonado a UE, «está obrigado a respectar» os acordos entre as partes e «garantir unha xestión compartida, sostible e baseada no ecosistema das poboacións de peces». En definiva, EAPO e EFFOP, «dispostos a atopar unha solución», reclaman á Comisión que interveña para que «poida seguir funcionando» a pesqueira do lanzón.