Granxas, fábrica, talleres e serradoiros poderán optar a o novo premio paisaxístico da Juana de Vega
SUSTENTABILIDADE
A fundación estrea categoría nos seus tradicionais galardóns de intervencións na paisaxe para acoller ás edificacións e instalacións produtivas no medio rural
23 abr 2024 . Actualizado ás 09:32 h.Recoñecer a calidade construtiva e a correcta integración paisaxística das construcións vinculadas con os procesos produtivos no medio rural é o obxectivo da nova categoría do premio Intervencións na Paisaxe que acaba de convocar a Fundación Juana de Vega . A entidade busca, con esta nova categoría centrada en edificacións e instalacións produtivas, darlles protagonismo a estas construcións como elementos que contribúen a mellorar a paisaxe de Galicia e poden servir de referencia social para futuras intervencións.
Segundo explican na fundación, as tipoloxías de proxectos que poden optar ao premio abarcan desde granxas, fábricas, talleres, adegas, serradoiros, fosas de xurro, silos, tolvas ou instalacións produtivas de calquera sector económico asentado no medio rural, como naves ou plantas industriais, entre outras.
O xurado terá en conta aspectos como a calidade da intervención e a súa contribución á mellora da paisaxe; ou a incorporación de criterios de sustentabilidade , uso racional dos materiais, estratexias de proximidade e economía circular. Tamén, a rducción da intervención realizada aos usos previstos e a capacidade da obra de converterse en referencia social. Admitiranse intervencións realizadas en Galicia e acabadas nos oito anos anteriores ao 2024, é dicir, entre o 1 de xaneiro do 2015 e o 31 de decembro do 2023.
O prazo para presentar candidaturas estará aberto ata o 30 de xuño deste ano e o fallo darase a coñecer no último cuadrimestre do ano. As candidaturas poden ser presentadas polos autores ou promotores privados do proxecto ou por un terceiro, incluídas asociacións e outras entidades que teñan coñecemento de intervencións que ao seu xuízo poidan ser merecedoras dos galardóns. O xurado tamén poderá premiar proxectos que non se presentasen á convocatoria se os considera merecedores do galardón.
A dotación económica será de 6.000 euros e, se o considera pertinente, o xurado poderá repartir o valor económico entre os autores e o promotor, podendo percibir este último ata o 50 % do mesmo. A maiores, e a criterio do xurado, poderán concederse dous accésits, dotados cada un deles con 1.500 euros.