A cooperativa gandeira de Monforte absorbe a de Sarria e suma 200 novos socios de golpe

A cooperativa gandeira Lemos acaba de absorber a Cogapen , unha entidade similar que ten a súa base na comarca de Sarria . A operación supón a incorporación automática á cooperativa de Monforte  dos 200 socios cos que conta Cogapen. É ademais do paso máis importante que dá a Cooperativa Lemos para consolidarse despois da compra fai sete anos da planta láctea de Celega, unha antiga fabricante de queixos do Saviñao .

Foron os propios responsables da Cooperativa Lemos os que anunciaron este xoves pola tarde a fusión con Cogapen. Trátase, explican, dunha «fusión por absorción da Cooperativa Cogapen, SC na Cooperativa Lemos, S.C.G, o que supón a disolución da primeira, que non entrará en liquidación, pasando o seu patrimonio e socios» á entidade monfortina, que á súa vez asumirá dereitos e deberes da sociedade que agora se disolve.

Trátase dun anuncio sobre feitos consumados, porque as dúas entidades celebraron as respectivas asembleas de socios que tiñan que dar o seu visto e prace ou rexeitar a absorción. No caso da cooperativa de Monforte, a proposta presentada polo seu consello reitor foi aprobada polo 100% dos participantes na asemblea. En Sarria, só un dos socios que votaron fíxoo en contra.

Esta fusión permitirá á Cooperativa Lemos crecer de forma significativa, tanto en número de socios como en volume de negocio. En canto á súa masa social, ata agora representaba a 650 gandeiros e desde este momento pasarán a ser 850.

Reforzarase ademais en Sarria, unha das comarcas gandeiras máis fortes de Galicia. Ata agora, a súa presenza centrábase sobre todo nas comarcas de Lemos e Chantada, aínda que tamén tiña un número significativo de asociados na de Sarria, fundamentalmente no municipio do Incio.

A proximidade xeográfica entre Monforte e Sarria e a potencia dos servizos que ofrece Lemos aos seus socios é unha das razóns que apoian a idoneidade desta operación. Pero tamén hai que ter en conta, apuntan na cooperativa monfortina, «o feito de que Lemos sexa unha coooperativa sempre preocupada pola comercialización dos produtos procedentes das explotacións».

Ao parecer, nos últimos tempos a cooperativa de Sarria tiña outras ofertas similares sobre a mesa, pero os responsables da cooperativa Lemos din que se optaron por recomendar aos seus socios a opción finalmente aprobada é fundamentalmente grazas á «presencia, participación e implicación dos sócios de Lemos e a consideración e trato directo, próximo e personal que se lles presta».

---

---

---