O paraíso bovino está en Montederramo: hai dez vacas por cada veciño

Ourense é unha provincia rural que sofre desde hai décadas unha sangría demográfica. Non é ningún dato novo. Cada vez hai menos veciños e iso tamén leva a que haxa menos de todo, incluídas explotacións gandeiras nunha terra que por tradición vive do campo. Pero aínda que baixan o número de granxas, o certo é que non sucede o mesmo co número de cabezas de gando. No caso do bovino hai un resurgimiento que se evidencia en case calquera concello que se analice (en case todos hai máis vacas e touros hoxe que vinte anos atrás) e que nalgúns é unha potencia económica. O caso máis rechamante é Montederramo, con diferenza o concello con maior número de cabezas rexistradas. Os datos oficiais do Instituto Galego de Estatística (que se refiren ao 2022) recollen que hai 6.322 reses, aínda que o vicepresidente da Asociación de Gandeiros de Montederramo , Sergio González, actualiza esa cifra e sitúaa por amais das 7.000. Fai vinte anos había 3.082 reses, o que supón que a cabana se duplicou en dúas décadas. Ao lado contrario, o que se refire á poboación, hai 701 veciños censados fronte aos 1.221 que había no 2002. Son case a metade.

Hai un rexurdir do sector. Na entidade sumaron socios no último ano, para roldar os 15, a maioría xente nova. Son unha parte das 74 explotacións existentes no municipio, lonxe das 168 que había no 2002. O motivo do crecemento —menos ganderías pero moito máis grandes— está na procura da rendibilidade. «Antes unha familia con 20 ou 25 vacas vivía. Agora non, agora precisas algo máis de 40, case o dobre», sinala González. Sábeo ben porque el vén de tradición gandeira. Os seus pais tiñan unha explotación, que segue xestionando a súa nai, e agora el ten a súa propia. «Eu teño 50 reprodutoras de carne. Aquí todo é carne, non hai vacas de leite. Antes con moitas menos vacas facían máis», sinala.

Algunhas das súas reses forman parte das 200 cabezas de gando de 34 explotacións que poderán verse na feira exposición de mañá, 12 de outubro. A maioría son de Montederramo, pero tamén estarán presentes ganderías de Castro Caldelas, Maceda e A Pobra de Trives. Son sobre todo de raza loura galega, caldelá e vianesa, aínda que tamén haberá exemplares de cachena, limusina e asturiana. Estarán expostas no recinto instalado ao redor da nave municipal, aberto desde as once da mañá. A esa hora porase á venda tamén a carne dos nove becerros de loura galega procedentes de ganderías da zona que foron sacrificados para a comida popular. Destinaranse uns 900 quilos á cita gastronómica e ao redor doutros 400 estarán á venda en fresco para quen queiran facerse con algúns deles.

Montederramo é o concello con máis vacas da provincia, aínda que hai outros 19 que superan o milleiro de cabezas.

Do outro lado da balanza, hai seis municipios nos que non hai nin unha soa: A Arnoia, Beade, Pontedeva, Ribadavia, Rubiá e Toén, segundo os datos oficiais do IGE, que se basea nos proporcionados pola Consellería do Medio Rural da Xunta.

 

---

---

---