A Asociación Forestal de Galicia pide igual trato fiscal para todos os donos de monte
FORESTAL
Apoia nas catro provincias proxectos de xestión compartida de terreos
28 abr 2024 . Actualizado ás 05:00 h.A demanda dunha mellor fiscalidade, máis equitativa, para os donos de montes foi un dos asuntos tratados na reunión que a Asociación Forestal de Galicia celebrou este sábado en Guitiriz. O punto de partida está na existencia dun dobre sistema de tributación, que o director da citada asociación, Francisco Dans, considerou abertamente «algo inxusto»,
Uns propietarios tributan por módulos, e outros, non. Os primeiros están incluídos no sistema denominado Réxime de Estimación Obxectiva, e os segundos, no Réxime de Estimación Directa. A este último están adscritos moitos autónomos que, lembrou Dans tras a reunión, non teñen o monte como única fonte de ingresos.
O problema co que se enfrontan ocorre cando declaran ingresos pola venda de madeira de quendas longas (por exemplo, a de piñeiro ou a de frondosas como o carballo). O que a asociación demanda é que eses propietarios tributen polos beneficios reais, non pola diferenza entre ingresos e gastos. O que non se ten en conta, dixo Dans, é que no tempo pasado entre a plantación e a curta houbo unha serie de traballos —podas ou tratamentos, por exemplo— que non se teñen en conta e considérase que todo ingreso é beneficio.
Esa cuestión, ademais da súa vertente económica, é vista na asociación como un freo á plantación de frondosas. Para solicitar un cambio na lexislación, a Asociación Forestal de Galicia, en colaboración con outras de España, levará o asunto ao Congreso dos Deputados.
Na asemblea deste sábado, doutra banda, analizouse o traballo de apoio á creación de agrupacións forestais de xestión conxunta. Trátase dunha medida impulsada pola Xunta na anterior lexislatura para animar aos donos de montes a unirse para ter leiras de maior superficie aínda que conservando a propiedade das súas parcelas.
Os proxectos que apoia a asociación están nas catro provincias, e responden tanto ao perfil de iniciativas de nova creación como de consolidación doutras nas que os donos xa deran pasos para a xestión compartida das súas propiedades.